ပန်းတိုင်းအားလုံးပွင့်လန်းစေချင်

နန်းဆိုင်နွမ်။ ။

“ တိမ်ပြာပြာနေ့ နေ့တနေ့  ဆန်းဒေး( Sunday) မှာကွယ် မင်္ဂလာဆောင်ပွဲလေး ကျင်းပနေပါတယ်။  ပျော်ရွှင်စရာလေးပေါ့ ချစ်တဲ့သူရယ်။ သူများကို အားကျမိတယ် အချစ်ကလေးရယ်” ဆိုတဲ့ သီချင်းလေးအတိုင်း လူသားတိုင်းဟာကိုယ်ချစ်တဲ့သူနဲ့ မင်္ဂလာပွဲကို ကျင်းပချင်ကြပါတယ်။ မင်္ဂလာဆောင်ပွဲလို့ပြောလိုက်ရင် လူတိုင်းဟာ အမျိုးသားနဲ့ အမျိုးသမီး ချစ်သူတွေသာ ခမ်းခမ်းနားနား ကျင်းပတယ်လို့ ပုံသေသတ်မှတ်ကြပါတယ်။

ဒါပေမယ့် ဇန်နဝါရီ ၂၆ရက်မှာ ပန်းရောင်ဝတ်စုံဆင်တူ ဝတ်ဆင်ပြီး LGBTQ လို့ သတ်မှတ်ထားတဲ့ လိင်တူချစ်သူ ၂ဦး ဖြစ်တဲ့ ကိုပြည့်နဲ့ ကိုကောင်းမြတ်ထူး တို့ ဟာ သြစတြေးလျနိုင်ငံမှာ လူသိရှင်ကြား မင်္ဂလာဆောင်ပွဲကို ကျင်းပခဲ့ပါတယ်။

လိင်တူချစ်သူ (LGBT) ဆိုတာ အမျိုးသမီးချင်းချစ်ခင်စုံမက်သူများ (Lesbian)၊ အမျိုးသားချင်း ချစ်ခင်စုံမက်သူများ (Gay)၊ အမျိုးသား၊ အမျိုးသမီး နှစ်မျိုးစလုံးကို ချစ်ခင်စုံမက်သူများ (Bisexual) ၊ ဆန့်ကျင်ဘက်လိင်သို့ ပြောင်းလဲခွဲစိတ်ထားသူများ (Transgender) ကို ခေါ်ဆိုတာဖြစ်ပါတယ်။

လိင်တူချစ်သူလက်ထပ်တာကို မြန်မာလူဘောင်အသိုင်းအဝန်းက လက်ခံလေ့မရှိသလို မိဘတွေကိုယ်တိုင်ကလည်း ဒီလိင်တူချစ်သူနဲ့ ပတ်သက်ပြီး လက်ခံတာတွေဟာ မရှိသလောက်ပါပဲ။ ဒါပေမယ့် ကိုပြည့် မိဘတွေကတော့  မင်္ဂလာပွဲကို လက်ခံတဲ့ မိဘတွေပါ။

“ သားကြီးနဲ့ကောင်းမြတ်ထူး တို့က LGBTQ Genders တွေကို တရားဝင်အသိအမှတ်ပြုတဲ့နိုင်ငံမှာ လက်ထပ်တာပါ။ မိဘအနေနှင့် ကျွန်တော်တို့လင်မယား လိုက်သွားချင်သော်လည်း ကိုယ့်တိုင်းပြည်ရဲ့ ခေတ်အခြေအနေနှင့် ကျနော့် ဘဏ္ဍာ ရေးက ခွင့်မပြုခဲ့ပါဘူး။ သူတို့ ၂ ယောက်တင်ထားတဲ့ ဓါတ်ပုံတွေကြည့်ပြီး  ကျနော်တို့ ပျော်တာပေါ့” လို့ ကိုပြည့်ရဲ့ ဖခင်ဖြစ်တဲ့  ဦးလှတင် က ပြောပါတယ်။

ဦးလှတင်ဟာ ဘဝမှာ LGBTQ တယောက်ရဲ့ ဖခင်ဖြစ်လာလိမ့်မယ်လို့ ဘယ်တုန်းကမှ မျှော်လင့်မထား ပြင်ဆင်မထားခဲ့သူ ဖြစ်ပါတယ်။ 

ဒ့ါကြောင့် လိင်တူချစ်သူရဲ့ မိဘအဖြစ် ရုတ်တရက် လက်ခံလာခြင်း မဟုတ်ကြောင်း၊ လွန်ခဲ့တဲ့ ၁၀နှစ်တာကာလကို ပြန်ပြီကြည့်ရင် ပထမ ၃နှစ်တာမှာ မိဘအနေနဲ့ လုံးဝလက်မခံကြောင်း၊ ဒုတိယ ၃နှစ်မှာ LGBT ဖြစ်တဲ့ သားကို လက်ခံလာပြီး တတိယ ၄နှစ်မှာ သားကိုရော သားချစ်သူကိုပါ လက်ခံလာကြောင်း ဖခင်ဖြစ်သူ ဦးလှတင် က ရှင်းပြပါတယ်။

ကိုပြည့်နဲ့ ကိုကောင်းမြတ်ထူးတို့ လိင်တူချစ်သူ ၂ဦး မင်္ဂလာဆောင်ပွဲကိစ္စကို မိဘတွေက ရုတ်တရက် လက်ခံလာခြင်း မဟုတ်ကြောင်း၊ ဆယ်စုနှစ် တစ်ခုကျော်ကြာ မိဘတွေကို ယုံကြည်လက်ခံလာအောင် လုပ်ယူရသလို မိဘတွေ လက်မခံခင်မှာ မိဘနဲ့ သားကြား အခက်အခဲများစွာ ကြုံတွေ့ ရပါတယ်။

“အန်ကယ်ကိုအထင်မကြီးကြပါနဲ့။ အန်ကယ်ဒီဟာကို ၁၀နှစ်ကျော်ယူရတယ်။  ပထမ ၃နှစ်ကတော့ သားနဲ့အဖေကြား တော်တော်အဆင်မပြေမှုတွေပေါ့။ အဲ့တော့ဘာဖြစ်လဲဆိုတော့ အဖေရှိရင်သားက နေရထိုင်ရတာ Stress (စိတ်ဖိစီးမှု) မိရင်မိနေမယ်။ ကိုယ်အနေနဲ့ကတော့ သူမလွတ်လပ်ဘူးပေါ့။ အဲ့ဒါတွေ ပြန်တွေးကြည့်ရင် အရမ်းသနားတယ်။ ဒါမဖြစ်သင့်ဘူးလေ” လို့ အတိတ်က ဖြစ်ရပ်တွေကို ဦးလှတင်က စိတ်မကောင်းစွာ ပြန်ပြောပြနေပါတယ်။

မိခင်ဖြစ်သူကတော့ ကိုယ်သားဟာ လိင်တူချစ်သူတယောက်လို့ သိလိုက်ချိန်မှာ လုံးဝ လက်မခံခဲ့တဲ့ မိခင်တစ်ဦးဖြစ်ခဲ့ပြီး၊ “LGBT ” ဖြစ်တဲ့သားကို ပုံမှန်သားယောင်္ကျား ဖြစ်လာအောင် ဆေးပညာအရ ကုသဖို့အထိ လုပ်ဆောင်ရန် ကြိုးစားခဲ့ကြောင်း ကိုပြည့်ရဲ့ မိခင် ဒေါ်အေးအေးသူက အတိတ်က ဇာတ်လမ်းကိုပြောပြပါတယ်။

“သားကြီးကို ပထမပိုင်းတော့ လက်မခံဘူး။ သားက အကြီးဆုံးသား ဖြစ်တယ်။ ရိုးရာအစဥ်အလာအရ သားကြီးဆိုရင် ဘယ်လိုဆိုတာရှိတယ်။ လက်မခံပေမယ့် အန်တီတို့က နိုင်ထက်စီးနင်းတော့ မဆက်ဆံခဲ့ဘူး”လို့ ဒေါ်အေးအေးသူက ဆိုပါတယ်။

မြန်မာနိုင်ငံတွေမှာ လိင်တူချစ်သူ အချင်းချင်း ချစ်ကြိုက်ခြင်းကို ဝဋ်ကြွေးကြောင့်၊ ရှေ့ဘဝကုသိုလ်ကံကြောင့်ဆိုပြီး ပြောဆိုကြပါတယ်။

လက်ရှိ ကိုကောင်းမြတ်ထူးနဲ့ ကိုပြည့်တို့ လူသိရှင်ကြားလက်ထပ်ချင်းဟာ ဝဋ်ကြွေးလက်ခံရခြင်းမဟုတ်သလို သားဖြစ်တဲ့အတွက် မသက်သာလို့ လက်ခံရခြင်းမဟုတ်ကြောင်း ဒေါ်အေးအေးသူက ထောက်ပြပြောပါတယ်။

“  သူဖြစ်တည်မှုကို လက်ခံတာပါ” လို့ ဒေါ်အေးအေးသူ က ပြတ်သားစွာ ပြောပြပါတယ်။

မြန်မာလူမျိုးဓလေ့ထုံးတမ်းအရ သားယောင်္ကျားလေးမွေးဖွားလာရင် အလွန်မြင့်မြတ်တဲ့သူ၊ အမွေဆက်ခံမယ့်သူလို့ ကိုင်စွဲထားပြီး၊ သမီးလေးတွေ ယောင်္ကျားလေးဆန်ပြီး ယောင်္ကျားလေးလို နေထိုင်ပါက မိဘတွေက ပြောဆိုမှု သိပ်မရှိကြဘဲ သားယောင်္ကျားလေး ဟာ လိင်တူချစ်သူ LGBT ဖြစ်ခဲ့ အလွန်ပင် လက်မခံကြပေ။

“ယောင်္ကျားလေးက Gay ဖြစ်သွားတာ ပိုခံစားရတယ်ဆိုတာ။ မြန်မာလူမျိုးတွေက ဖိုဝါဒခေါ်တယ်။ ယောင်္ကျားကို ရှေ့တန်းတင်တဲ့ဝါဒ မဖြစ်ရဘူး။ မိန်းကလေး LGBT ဖြစ်တာထက် ယောင်္ကျား ဂေးဖြစ်သွားတာ မဖြစ်သင့်ဘူးဆိုတဲ့ အစွဲက မရှိသင့်ဘူး။ ဖိုဝါဒမရှိသင့်ဘူး” လို့  ဦးလှတင် က  ထောက်ပြပြောဆိုပါတယ်။

မြန်မာနိုင်ငံမှာ လိင်တူချစ်သူချင်း လက်ထပ်ခွင့်မပြုထားပေမယ့် ၂၀၁၄ ခုနစ်တုန်းကလည်း ကိုမျိုးမင်းလတ်နဲ့ ကိုတင်ကိုကို တို့ဟာ လူသိရှင်းကြား ၁၀နှစ်ပြည့် မင်္ဂလာဆောင်ပွဲ ပြုလုပ်ခဲ့ကြပါတယ်။ ၂၀၁၄ခုနစ်နောက်ပိုင်းကာလတွေမှာ အမျိုးသမီးအချင်းချင်း လိင်တူချစ်သူတွေလည်း မင်္ဂလာဆောင်ပွဲတွေ လုပ်လာပေမယ့် မြန်မာပြည်မှာတော့ တရားမဝင်သေးပါဘူး။

ကမ္ဘာပေါ်မှာ Same Marriage (လိင်တူချစ်သူ လက်ထပ်)နိုင်တဲ့နိုင်ငံတွေ ကတော့ သြစတြေးလျ၊ ဂျာမနီ၊ အမေရိကန်၊ ဖင်လန်၊ စကော့လန်၊ ပြင်သစ်၊ နယူးဇီလန်၊ ဒိန်းမတ်၊အိုင်လန်၊ ဆွီဒင်၊နော်ဝေး၊ စပိန်၊ ကနေဒါနဲ့ နယ်သာလန် စတဲ့နိုင်ငံတွေပါပဲ။

ဒါ့ပေမယ့် မြန်မာနိုင်ငံမှာတော့ လိင်တူချစ်သူများ (LGBTQ) အပေါ် သက်ရောက်နိုင်တဲ့ ဥပဒေ ရာဇာသတ်ကြီး ပုဒ်မ ၃၇၇ သဘာဝမကျတဲ့ လိင်ဆက်ဆံမှုပြုခြင်း၊ တိရိစ္ဆာန်နဲ့ လိင်ဆက်ဆံခြင်း တို့ကို ကျူးလွန်ပါက ထောင်ဒဏ် တသက်တကျွန်း ဖြစ်စေ၊ ၁၀နှစ်ဖြစ်စေ ၊ ငွေဒဏ်ဖြစ်စေ၊ ထောင်ဒဏ်နဲ့ ငွေဒဏ်၂ရပ် စလုံး ဖြစ်စေ ချမှတ်နိုင်ပါတယ်။

အဲ့ဒီဥပဒေကို ပယ်ဖျယ်ပေးဖို့ ခေတ်ဆက်ဆက်က လိင်တူချစ်သူအခွင့်အရေး လှုပ်ရှားသူတွေ လူ့အခွင့်အရေး လှုပ်ရှားသူတွေ  တောင်းဆိုခဲ့ကြပေမယ့် လက်ရှိအချိန်ထိ မအောင်မြင်ခဲ့သေးပါဘူး။

မိဘအသိုင်းအဝန်း ၊ ပတ်ဝန်းကျင်းအသိုင်းအဝန်းတွေကြောင့် လိင်တူချစ်သူနဲ့ပတ်သက်ပြီး လက်မခံနိုင်တဲ့ အတွက်  ဖခင်ကိုယ်တိုင် ဆိုးရွားတဲ့စကားလုံးနဲ့ နှိပ်စက်တဲ့အဆင့်ထိ ခံခဲ့ရသူထဲမှာ အသက် ၃၀ကျော် အရွယ် အာကာတယောက် အပါအဝင်ပါပဲ။

“ ကိုယ်ချစ်တဲ့သူကိုတော့ ပေါ်တင်တွဲချင်ကြတာပဲလေ။ ကျနော်အမူအယာက နွဲ့တော့ အဖေက မကြိုက်ဘူး။ အမြဲတမ်းကျနော်ကို စကားလုံးတွေနဲ့နှိပ်ကွပ်တယ်။ ပြီးတော့ အသုံးမကျတဲ့ ကောင်ဆိုပြီး နေ့တိုင်းနီးပါး ပြောတယ်။ ကျနော်ဖြစ်တည်မှုက မိဘတွေကို ဘာများဒုက္ခပေးနေလို့လဲ” လို့ အာကာ တယောက် ဝမ်းနည်းစွာနဲ့ ရင်ဖွင့် ပြောဆိုလာပါတယ်။

လူတယောက်ရဲ့ ဖြစ်တည်မှုဟာ ပြောင်းလဲမှုမရှိနိုင်ကြောင်း၊ ပြုပြင်လို့မရနိုင်ကြောင်း ကို မိဘတွေ သိရှိစေချင်ကြောင်းနဲ့ လိင်တူချစ်သူ (LGBT) တွေရဲ့ ဖြစ်တည်မှုကို နားလည်စေချင်ကြောင်း အာကာ ကဆိုပါတယ်။

“ ကျနော်တို့ LGBT ဖြစ်ရတာ ရိုးရှင်းပြီး လွယ်ကူမနေပါဘူး။ ပတ်ဝန်းကျင် အပြောတွေ ခေါင်းထဲမထည့်တက်လို့ ခံသာတာ။ အခုလည်း နှစ်ဘက်မိဘတွေ သိသွားမှာ အရမ်းကြောက်နေရတယ်။ ဖွင့်မပြောရဲဘူး”လို အာကာက စိတ်မကောင်းစွာ ပြောလာပါတယ်။

ဆက်လက်ပြီး လိင်တူချစ်သူရဲ့ ဖခင် ဦးလှတင် က “LGBT ခံယူထားတဲ့ သား၊သမီးတွေရဲ့ မိဘတွေကို ကျနော် လျှောက်ခဲ့တဲ့ လမ်း လွန်ခဲ့တဲ့ ၁၀နှစ်က လိုမဖြစ်စေချင်ဘူး။ ကလေးလည်းရော ကိုယ်ရောပင်ပန်းတယ်။ ကလေးတွေကိုလည်း သနားတယ်” လို့ ပြောပါတယ်။

မြန်မာပြည်တော်လှန်ရေး၊ နိုင်ငံရေး ပဋိပက္ခတွေချုပ်ငြိမ်းသွားပါက မြန်မာနိုင်ငံမှာ LGBT အရေး၊ LGBT သား၊သမီးတွေနဲ့ မိဘတွေကြားဝင် စေ့စပ်ညှိနှိုင်းပေးသူ လုပ်ချင်ကြောင်းလည်း သူက ပြောဆိုလိုက်ပါတယ်။

“အန်ကယ်ဆုံးဖြတ်လိုက်တယ် ကော်မန့် တခုချင်းဖတ်မှ အားလုံးသိရတယ်။  ခြေထောက်နဲ့ကန်ချခံရတဲ့ကလေးနဲ့ အစုံပါပဲ။ အရမ်းသနားတယ်။ အဲ့ကြားမှာ အန်ကယ်ဝင်ရပ်ချင်တယ်။ ပွဲစားလုပ်ချင်တာ မိဘနဲ့သား၊သမီးကြားပြေလည်ချင်တယ်။ ကိုယ်လို မခံစားစေချင်ဘူး။ အဲ့အလုပ်ကို အန်ကယ်လုပ်အုံးမှာ” လို့ ဦးလှတင် က  ပြတ်သားစွာပြောဆိုလိုက်ပါတယ်။

LGBTQ သား၊သမီးတွေအနေနဲ့ မိဘတွေလက်မခံပါက ကိုယ်ဖြစ်တည်မှုကို စိတ်ရှည်ပြီး ဖွင့်ပြ ရှင်းပြ ရန်လိုအပ်ကြောင်း၊ LGBTQ တွေဟာ ရောဂါတခုမဟုတ်ကြောင်း ဖြစ်တည်မှုဖြစ်ကြောင်းကို သေချာရှင်းပြရန် လိုအပ်ကြောင်း ဒေါ်အေးအေးသူ က ပြောပါတယ်။

တဖက်မှာလည်း မိဘတွေဟာ ကိုယ့်သား၊သမီးကို ရွေးချယ်ပိုင်ခွင့်မရှိတဲ့အတွက် ကိုယ့်သား၊သမီး LGBTQ ဖြစ်ပါက စွန့်ပစ်တာတွေမလုပ်သင့်ပေ။

“ LGBTQ သားငယ် သမီးငယ်တို့ကို ကျနော်ပြောချင်တာကတော့  Gender ကို မေ့ပစ်ပါ (မမေ့လည်း ကိစ္စမရှိပါ) လောကကြီးကို ရဲရဲရင့်ရင့် တိုးဝင်ထိုးဖောက်ပါ” လို့ ဦးလှတင်က LGBTQ တွေကို အားပေးစကား ပြောဆိုလိုက်ပါတယ်။

ကိုယ့်သား LGBT အဖြစ် အစပိုင်းမှာ လက်မခံခဲ့တဲ့ ဒေါ်အေးအေးသူ တယောက်ဟာ အခုနောက်ပိုင်းမှာ LGBT တွေကို စိတ်ဓာတ်မကျဖို့၊ LGBT တွေ ကလေးမမွေးနိုင် မျိုးမပွားနိုင်ရင်တောင် အခုခေတ်ကာလဟာ ဆေးပညာခေတ်မီတဲ့အတွက် ဒါတွေကို စိတ်ထဲမထားဖို့ ပြောဆိုလိုက်ပါတယ်။

လိင်တူချစ်သူအချင်း လက်ထပ်ခဲ့တဲ့ ကိုပြည့်ရဲ့ မိဘ ၂ပါးကတော့ LGBT အရေးနဲ့ပတ်သက်ပြီး ပိုလေ့လာနေကြောင်း၊ LGBT မိဘတွေကို  ဖြောင့်ဖျပေးနိုင်ဖို့အတွက် ကြိုးစားသွားမယ်လို့ လည်း သူတို့ ၂ဦးက ပြောပါတယ်။