KLFB ငွေလိမ်ဂိုဏ်းကြောင့် သားကောင် ဖြစ်ခဲ့တဲ့ အမျိုးသမီးတွေ

မိုးတိမ်

မြန်မာနိုင်ငံမှာ မတ်လလောက်ကစပြီး KLFB (Kaidali Investment Management) နာမည်နဲ့ ဘောလုံး လောင်းကစားနည်း ပါဝင်တဲ့ အက်ပလီကေးရှင်းတစ်ခု ပေါ်ပေါက်ခဲ့ပါတယ်။

အဲဒီ Application ကို ဘန်းပြကာ KBZ Pay, KBZ Bank Account များစွာ အသုံးပြုပြီး ငွေကြေး သိန်းပေါင်း မြောက်များစွာ လိမ်လည်ခံရမှုကို ပြည်သူတွေ ကြုံခဲ့ရပါတယ်။

ဒီ KLFB Application မှာ ငွေသွင်းထားတဲ့ မန်ဘာဝင်သူ အရေအတွက်က တစ်နိုင်ငံလုံး အတိုင်းအတာနဲ့ အဖွဲ့ဝင်ပေါင်း ငါးသိန်းထက်မနည်း ရှိခဲ့ပြီး ငွေကျပ်တစ်သောင်းက စတင်ကာ အကန့်အသတ်မရှိ ရင်းနှီးမြုပ်နှံနိုင်တယ်လို့လည်း ဆိုပါတယ်။

ငွေလိမ်ခံရသူတွေထဲမှာ ဘောလုံးလောင်းကစား ဝါသနာပါတဲ့ အမျိုးသားတွေအပြင် စစ်တပ် အာဏာသိမ်း ကာလမှာ ဝင်ငွေနည်းပါးပြီး အလုပ်လက်မဲ့ ဖြစ်နေတဲ့ အမျိုးသမီးတွေလည်း ပါဝင်ပါတယ်။

ကျေးရွာနဲ့ နယ်ဒေသတွေမှာဆို အိမ်ထောင်သည် အမျိုးသမီးတွေ၊ အမျိုးသမီးငယ်တွေနဲ့ အချို့ဆိုရင် မိသားစုလိုက် အလိမ်လည်ခံရတာတွေလည်း ရှိနေပါတယ်။

ဒါတွေဟာ ပြည်တွင်းမှာ အလုပ်အကိုင် ရှားပါးတာနဲ့ ကျေးလက်တွေမှာ စာပေဗဟုသုတ နည်းပါးသူတွေကို မက်လုံး ပေး ဆွယ်ကာ လိမ်လည်လာတဲ့ နည်းလမ်းသစ်တစ်ခုလည်း ဖြစ်နေပါတယ်။

၂၀၂၃ အောက်တိုဘာလ ၁၃ ရက်က စတင်ပြီး KLFB အပလီကေးရှင်းမှာ ငွေသွင်းရင်းနှီးမြှုပ်နှံ ထားသူတွေကို ရုတ်တရက် ငွေထုတ်ပေးတာတွေ ရပ်ဆိုင်းလိုက်တာကြောင့် မန်ဘာဝင်တွေအနေနဲ့ ငွေကြေးဆုံးရှုံးမှုတွေ ဖြစ်ခဲ့တယ်လို့ ဆိုပါတယ်။

ဒါ့အပြင် ငွေထုတ်ချင်တယ်ဆိုရင် KLFB အကောင့်လက်ကျန်ငွေရဲ့  ငါးရာခိုင်နှုန်း ထပ်သွင်းရမယ်လို့ KLFB ဘက်မှ အသိပေးစာ ထုတ်လာခဲ့ပြီး ငါးရာခိုင်နှုန်း ပေးသွင်းကြပေမယ့်လည်း ငွေထုတ်ယူမှုတွေ လုပ်မရတာကြောင့် KLFB ဟာ လိမ်လည်မှုကို နောက်ဆုံးအဆင့်အထိ လုပ်ဆောင်ခဲ့တာလို့ မန်ဘာဝင်တွေက ပြောပါတယ်။ 

“ဩဂုတ်လလောက်ကစပြီး မန်ဘာဝင်ခဲ့တာ၊ ကျမ လုပ်ငန်းခွင်ထဲက ညီမတစ်ယောက်က ပိုက်ဆံ တစ်သောင်းနဲ့ စလို့ရတယ် ပြောပြီး သူက ထည့်ခဲ့တာ။ ကျမက မဝင်ချင်ဘူးလို့လည်း ပြောတယ်။ သူက မန်ဘာ ရချင်တော့ တစ်သောင်းကို စိုက်ထည့်ပြီး လုပ်ပေးတာ။ အဲ့ဒီညီမလေးက သူ့အကောင့်ထဲကို ပိုက်ဆံထည့်ဖို့ လိုနေတော့ သူ့ဆွဲကြိုးကိုပေါင်းပြီး ၁၀ သိန်း ကို ထပ်ထည့်တယ်။ ကျမတို့က စိုးရိမ်တယ် မလုပ်နဲ့ပြောတော့ သူက ကိစ္စမရှိဘူး ဒါက တကယ်ရတယ်လို့ပြောတာ။ သူကတော့ တစ်လအတွင်းမှာ အရင်းတွေပြန်တော့ ရလိုက်တယ်။”လို့ မနူးနူး (အမည်လွှဲ)က ပြောပါတယ်။

မနူးနူးကတော့ ကချင်ပြည်နယ်၊ မြစ်ကြီးနားမြို့မှာ နေထိုင်သူဖြစ်ပြီး ဝင်ငွေ နည်းပါးတဲ့ အမျိုးသမီး တစ်ယောက်ပါ။  ဒါ့အပြင် သူတို့ ဒေသမှာ နယ်မြေ မတည်ငြိမ်တာနဲ့ စီးပွားရေးတွေ အဆင်မပြေတာကြောင့် အခုလို အွန်လိုင်း လောင်းကစားမှာ ပါဝင်ဖြစ်တာလို့ ဆိုပါတယ်။

ယုံကြည်ရတဲ့ မိတ်ဆွေတစ်ယောက်က ဒီအပလီကေးရှင်းကနေ အမြတ်ငွေတွေ အများကြီး ရနိုင်တယ်လို့ ညွှန်ပေးတာကြောင့် KLFB မှာ ရင်းနှီးငွေ ထည့်ဖြစ်တာလို့ မနူးနူးက ဆိုပါတယ်။

“ဒါတောင် ကျမက သိပ်မယုံသေးလို့ ငွေကို မထည့်သေးဘူး၊ ပြီးတော့ ကျမတို့ဘက်က ကျောင်း ဆရာ တစ်ယောက် ကလည်း KLFB ကအမြတ်ပေးတယ်။ သူက တကယ် ကောင်းတယ် ဆိုပြီးတော့ ပြောတယ်။ ကြော်ငြာတွေကလည်း ယုံကြည်အောင်ရေးသားထားတာဆိုတော့ ကျမတို့တွေး လိုက်တာက သူ့လိုမျိုး ရိုးရိုးသားသားလူကောင်းလူမွန် ဆရာ တစ်ယောက်ကတောင် ကြော်ငြာတယ်။ သူလည်းလုပ်နေတာ ဆိုတော့ အဲ့ဒါကိုယုံပြီး ကျမလည်း သိန်း ၆၀ နီးပါး လောက် ထည့်လိုက်တယ်။ ကျမတို့ ထင်တာက ဘောလုံးပွဲ လောင်းတယ်ပဲ ထင်ခဲ့တာ။ ကျမတို့ကို သူတို့ဘက်က ရတဲ့ အမြတ်ထဲကနေ ၁ ရာခိုင်နှုန်း၊ ၂ ရာခိုင်းနှုန်းကို ခွဲပေးတယ် လို့ပဲထင်တာပေါ့နော်။” လို့ မနူးနူးက သူ့ရဲ့ အတွေ့အကြုံကို ရင်ဖွင့် ပြောပြပါတယ်။

ခေတ်ကာလ မကောင်းတဲ့ အခြေအနေမှာ ဒီလို လိမ်လည်ခံရမယ်လို့ မနူးနူးက ထင်မထားဘဲ ရင်းနှီးသူ ကျောင်း ဆရာက အကြိမ်ကြိမ် ယုံကြည်အောင် ပြောပြ စည်းရုံးတာကြောင့် အနှစ်နှစ် အလလ စုဆောင်းထားတဲ့ ငွေကြေး တွေကို ရင်းနှီးမြှုပ်နှံမိတာလို့ ဆိုပါတယ်။

အခုလို အလိမ်အလည်ခံရတာ သိတဲ့အချိန်မှာ ကျောင်းဆရာဘက်ကလည်း တာဝန်ယူမှု တာဝန်ခံမှု မရှိသလို သူတို့ ဒေသဘက်မှာလည်း မနူးနူး နည်းတူ အလိမ်လည်ခံရတဲ့ အမျိုးသမီးတွေလည်း အမြောက်အမြား ရှိတယ်လို့ ပြန်သိ ရကြောင်း ပြောပါတယ်။

မနူးနူးလို နောက်ထပ် အလိမ်ခံရသူ တစ်ယောက်ကတော့ မန္တလေးတိုင်း၊ မိတ္ထီလာမြို့က အသက် ၃၄ နှစ်အရွယ် ပျံကျ စျေးရောင်းသူ မမာလာ (အမည်လွှဲ) ပါ။

မမာလာဟာ တစ်ရက်တစ်ရက် စျေးရောင်းရတဲ့ ဝင်ငွေက ကျပ် နှစ်သောင်းကနေ သုံးသောင်းဝန်းကျင်သာရှိပြီး အဲဒီ ဝင်ငွေနဲ့ သူက မိသားစုငါးယောက်ကို ဦးဆောင် လုပ်ကျွေးနေရတာပါ။

စစ်တပ် အာဏာမသိမ်းခင်ကာလကဆိုရင် မမာလာတို့ မိသားစု စားဝတ်နေရေး ဖူလုံပေမယ့် အာဏာသိမ်း ပြီး နောက်မှာတော့ ကုန်စျေးနှုန်းတွေ တက်တာနဲ့ အလုပ်အကိုင် မဖြစ်တာကြောင့် စျေးမရောင်းရတဲ့နေ့တွေလည်း ခပ်စိတ်စိတ် ကြုံလာရပါတယ်။

စျေးရောင်းဖို့ အရင်းအနှီးကို အတိုးနဲ့ ငွေချေးထားရတဲ့ မမာလာက သူတို့ နယ်ဘက်မှာ KLFB အကောင့်သုံးလို့ ငွေကြေး အမြတ်အစွန်း များများရတယ်ဆိုတဲ့ သတင်းစကားတွေကြောင့် ရှိစုမဲ့စု ပိုက်ဆံလေးနဲ့ ဒီလုပ်ငန်းမှာ ပိုက်ဆံ ထည့်ဖို့ စဉ်းစား ဆုံးဖြတ်ခဲ့ပါတယ်။

“ကျမတို့က ပိုက်ဆံ ရှိလို့ ထည့်ကြတာ မဟုတ်ဘူး။ တကယ် ပိုက်ဆံ လိုနေတာ။ ကျမနဲ့ သိတဲ့ နောက်ထပ် အစ်မ တစ် ယောက်ကိုပါ ပိုက်ဆံကို အတိုးနဲ့ ချေးပြီး ထည့်လိုက်တာ။ ကျမတို့ ဒေသမှာ အချို့ဆိုရင် ရှိတဲ့ဟာတွေ ပေါင်ပြီး ထည့် ကြတယ်။ ကျမကို KLFB က လူတွေ ဖောက်ပေးထားလို့ အကောင့် ငါးခုလောက် ရှိတယ်။ သူတို့ နာမည်နဲ့ တယ်လီဂရမ် အကောင့်တွေ ဖောက်ထားတယ်။ ကျမအဖွား ဆေးကုဖို့ ပိုက်ဆံ လိုနေတာနဲ့ ကျမလည်း သေချာ မစဉ်းစားဘဲ ငွေ သိန်း ၄၀ လောက် ထည့်မိတယ်။”လို့ မမာလာက ရင်ဖွင့် ပြောပြပါတယ်။

မမာလာ လက်ရှိ စျေးရောင်းတဲ့ အလုပ်က ငွေ သိန်း ၄၀ ရဖို့ဆိုတာ မလွယ်ကူပါဘူး။ ဒါပေမဲ့ ငွေတိုးချေးပေးသူဆီက ချေးယူတာ၊ ရှိတာတွေကို ပေါင်နှံတာနဲ့ စုဆောင်းထားတာတွေကိုပါ ထည့်သွင်းမိတယ်လို့ ဆိုပါတယ်။

KLFB အပလီကေးရှင်းက အစပိုင်းမှာတော့ ယုံကြည်အောင် ငွေသွင်းထားသူတွေကို KBZ Pay ကနေ ပုံမှန် ငွေထုတ် လို့ရတဲ့ ပုံစံမျိုးနဲ့ အယုံသွင်းခဲ့ပါတယ်။ မတ်လမှာ စတင် ပေါ်ပေါက်ခဲ့တဲ့ အဲဒီ အပလီကေးရှင်းဟာ ခုနစ်လအကြာ အောက်တိုဘာလမှာ အဖွဲ့ဝင်ပေါင်း ငါးသိန်းထက် မနည်း ရှိခဲ့ပြီး အဲဒီလူတွေ အကုန်လုံးနီးပါးကို လိမ်လည် သွားခဲ့တာပါ။

တစ်ယောက်နဲ့ တစ်ယောက် လိမ်လည်ခံရတဲ့ ငွေပမာဏတွေ မတူညီပေမယ့် လိမ်လည်ခံရသူတွေဟာ တစ်ယောက်ကို အနည်းဆုံး သိန်းဂဏန်း ဆယ်ချီ၊ ရာချီတဲ့အထိ အလိမ်လည်ခံရတဲ့ ဖြစ်စဉ်တွေ အများအပြား ရှိခဲ့တာပါ။

တစ်လကို လစာငွေ ပုံမှန် တစ်သိန်းလောက်ပဲ ဝင်ငွေရှိခဲ့တဲ့ မစိုးစိုးကလည်း သူကိုယ်တိုင် အာမခံပြီး ရင်းနှီးတဲ့ အမျိုးသမီး မိတ်ဆွေတွေကို KLFB မှာ ငွေသွင်းဖို့ မိတ်ဆက်ပေးခဲ့ပါတယ်။ သူအပါအဝင် အမျိုးသမီးတွေ အားလုံး ငွေ သိန်းဆယ်နဲ့ချီပြီး အလိမ်ခံရတာကြောင့် ပြန်လျော်ပေးနိုင်ဖို့ကို အခက်တွေ့နေပါတယ်။

“ကျမတို့ အကောင့်တွေထဲမှာဆို တစ်ခုက ၁၀ သိန်း ၊ တစ်ခုက ငါးသိန်းနဲ့ နောက်တစ်ခုဆိုရင် သိန်း ၄၀ ကျော် ထည့်ထားပြီး လုံး၀ကို ထုတ်မရတော့ဘူး။ ဆေးကုသွားရမယ့် လူကလည်း ပိုက်ဆံချေးပြီး သွားလိုက်ရပြီ။ ပေါင်ထားတဲ့ ပစ္စည်းတွေကိုလည်း မရွေးနိုင်တော့ဘူး။ အတိုးက တစ်လကို နှစ်သိန်းကျော်လောက် ဆပ်နေရတာ၊ ကျမရတဲ့ လခဆိုရင်တောင် တစ်သိန်းလောက်ပဲရှိတာ။ ကျမက ပြောလို့ လိုက်လုပ်တဲ့ လူတွေဆိုတော့လည်း ကျမတာဝန်ဖြစ်သွားတာပေါ့နော်။ တော်တော်လေးကို မယုံနိုင်စရာ ပုံစံမျိုးဖြစ်သွားပြီး မျက်ရည်နဲ့ မျက်ခွက်ပဲ အခုကျမှသာ ဖြေသာနိုင်လာတယ်။ အခုလို တဖွဲ့လုံး အလိမ်ခံလိုက်ရတော့ ဒီငွေတွေကို ကျမဘယ်လို စိုက်လျော်ရမလဲတောင် မသိတော့ဘူး။” လို့ မစိုးစိုးက ပြောပါတယ်။

မစိုးစိုး နည်းတူ ငွေ ၁၉ သိန်းကျော် အလိမ်ခံရတဲ့ အမျိုးသမီးကတော့ ရန်ကုန်မြို့၊ တာမွေမြို့နယ်မှာ နေထိုင်တဲ့ အိမ်ထောင်ရှင်မ တစ်ဦးပါ။ သူကတော့ မိသားစု မသိအောင် ငွေ ၁၉ သိန်းကျော် ထည့်သွင်း အလိမ်ခံရတာကြောင့် ပေါင်ထားတဲ့ ပစ္စည်းတွေလည်း ပြန်မရွေးနိုင်တော့ဘူးလို့ ဆိုပါတယ်။

“ညီမက စက်တင်ဘာလ ၁၁ ရက်နေ့က ၁၉ သိန်း ၉ သောင်း ငွေသွင်းပြီး မန်ဘာဝင်ခဲ့တာ ၊ မန်ဘာ ခေါ်တဲ့သူတွေ ကလည်း တာဝန်ယူပေးတာမျိုးမရှိသလို အရင်းငွေလည်း တကျပ်မှ ပြန်ရတာမျိုး မရှိခဲ့ဘူး။ ပေါင်ထားတဲ့ ပစ္စည်း တွေဆိုရင် တစ်ခုမှ ပြန်မရွေးနိုင်တော့ဘူး။ လက်ရှိမှာ ကြုံတွေ့ရတဲ့ စိတ်ခံစားချက်ကတော့ သေချင်တာ၊ ရူးချင်တာ အဲ့နှစ်ခုထဲက တစ်ခုခုဖြစ်ချင် နေတာတော့ အမှန်ပဲ၊ အခုလို မန်ဘာဝင် ငွေသွင်းလိုက်တာကို အိမ်ကလူတွေတစ်ယောက် မှ မသိဘူး။ အဲ့ဒါကြောင့် ဖြေရှင်းဖို့ကို အတော်လေး အခက်တွေ့နေတာပေါ့။ ပစ္စည်းတွေ ပြန်ရွေးဖို့ဆိုတာ လက်ထဲ ပိုက်ဆံ လုံး၀မရှိတဲ့ အခြေအနေတွေဖြစ်သွားတယ်။” လို့ အဲဒီ အမျိုးသမီးက ဆိုပါတယ်။

အခုလို ငွေလိမ်ခံရတာတွေကိုလည်း KLFB  လုပ်ကိုင်သူတွေချည်း စုစည်းထားတဲ့ ဖေ့စ်ဘွတ်ခ် ဂရုတွေနဲ့ တယ်လီဂရမ် ချန်နယ်တွေမှာ အဖွဲ့ဝင် အချင်းချင်း ဆက်သွယ် ပြောဆိုကြရာကနေ သိရသလို၊ အလိမ်ခံရသူအချင်းချင်းလည်း ပြန်နှစ်သိမ့်နေရတယ်လို့ ဆိုပါတယ်။

“လိမ်သွားတဲ့ သူတွေကို မိလည်း မိစေချင်တယ်။ ကျမတို့ ကချင်ပြည်နယ်ဘက်မှာ ပါသွားတာ သိန်းပေါင်း မြောက်မြားစွာ ရှိတယ်။ ကချင်ပြည်နယ်လို ရိုးသားတဲ့ တိုင်းရင်းသားတွေတောင် မပြောနဲ့ နေပြည်တော် အပါအဝင် ဒါမျိုးအလိမ်ခံရတာ တစ်နိုင်ငံလုံး အတိုင်းအတာအနေနဲ့ကို အလိမ်ခံလိုက်ရတာ။”လို့ ကချင်တိုင်းရင်းသူ မနူးနူးက ပြောပါတယ်။

စစ်တပ်အာဏာသိမ်းပြီးနောက်ပိုင်း တရားဥပဒေစိုးမိုးမှု နည်းပါတဲ့အချိန်ကို အသုံးချပြီး အုပ်စုဖွဲ့ လိမ်လည်မှုတွေဟာ အွန်းလိုင်းရော၊ မြေပြင်အထိပါ ဆင်းပြီး မြန်မာနိုင်ငံ နေရာအနှံ့အပြားမှာ ကြုံတွေ့နေရတာပါ။

ပြီးခဲ့တဲ့ ၂၀၂၂ ခုနှစ် ဖေဖော်ဝါရီလ အစောပိုင်းကလည်း Joom Application ဆိုတဲ့ နာမည်နဲ့ အွန်လိုင်းကနေ ကလစ် နှိပ်ပေးရုံနဲ့ စျေးရောင်း ဝက်ဘ်ဆိုဒ် တစ်ခုကနေ အမြတ်ငွေများစွာ ရရှိမယ် ဆိုပြီး မက်လုံးပေး လိမ်လည်မှုဖြစ်စဉ် တစ်ခုလည်း ရှိခဲ့ပါတယ်။

အဲဒီ Joom အပလီကေးရှင်းမှာ အဖွဲ့ဝင် အရေအတွက် သိန်းချီတိုးဖို့ ယုံကြည်အောင် ငွေသွင်း ငွေထုတ်မှုတွေ ပြုလုပ်ပေးခဲ့ပြီး လုံလောက်တဲ့ မန်ဘာဝင် အရေအတွက်၊ သွင်းငွေ ပမာဏ များလာခဲ့ပြီးနောက် ခုနစ်လဝန်းကျင်မှာပဲ လိမ်လည်မှု ကြုံခဲ့ကြရတာ ဖြစ်ပါတယ်။

အွန်လိုင်းလောင်းကစားနဲ့ ငွေကြေး လိမ်လည်တာတွေကို စစ်ကောင်စီ အနေနဲ့ ထိရောက်တဲ့ အရေးယူ ကိုင်တွယ်မှု မရှိတာကြောင့် လောက်ကိုင်၊ မြ၀တီ ရွှေကုက္ကိုလ် စတဲ့ နေရာတွေမှာ ငွေလိမ်ဂိုဏ်းတွေဟာ ပေါ်ပေါ်ထင်ထင် လုပ်ကိုင်နေသလို အခုလို နည်းပညာ အသုံးချကာ အွန်လိုင်း ငွေကြေး လိမ်လည်တာတွေ ဆက်တိုက် ပြုလုပ်နေတာ ဖြစ်ပါတယ်။