လွတ်မြောက်နယ်မြေက တော်လှန်ရေး လက်ခတ်သံ

ဒေဝီ။ ။

ပန်းဆီရောင် ချည်ခင်တွေကြား ရိုက်တံ(ရက်ကန်းယက်ရာမှာသုံးတဲ့သစ်သားပြား)ထိုးလိုက် ပြန်ထုတ်လိုက်နဲ့ ချည်တစ်မျှင် ချင်းကို စိတ်ရှည်လက်ရှည်နဲ့ အမျိုးသမီးတစ်ဦးက ယက်လုပ်နေတယ်။

ရက်ကန်းယက်နေတဲ့ အမျိုးသမီးမှာ အချိန်ကြာမြင့်စွာ ထိုင်ပြီးယက်လုပ်ရတာကြောင့် ခါးနာပြီး လက်ချောင်းလေးတွေ နာကျင်ပေမယ့်လည်း နာကျင်မှုကိုလစ်လျူရှုကာ ယက်ကန်းထည်လေး ပြီးစီးအောင် ကြိုးစားပမ်းစား ယက်လုပ်နေပါတယ်။

သူကတော့ ရဲဘော်မုစိ ခေါ် မစုမြတ်ပါ။ လွတ်မြောက်နယ်မြေမှာနေပြီး အာဏာရှင်ကိုတော်လှန်နေပေမယ့် ရိက္ခာငွေကြေး လိုအပ်ချက်အတွက် ရိုးရာလက်မှုထည်လေးတွေ ယက်လုပ်ပြီး ဝင်ငွေရှာဖွေနေသူတစ်ဦးပါ။

ပြည်သူ့ကာကွယ်ရေးတပ်ဖွဲ့ဝင်(PDF)တွေက စစ်အာဏာရှင်ကို ဆန့်ကျင်ဖို့အတွက် သက်တောင့်သက်သာနေလာခဲ့တဲ့ မိဘရင်ခွင်၊ အဆင်ပြေပြေနေလာခဲ့တဲ့ လူနေမှုဘဝတွေကို စွန့်လို့ ဘာမှမပြည့်စုံတဲ့ တောထဲလာပြီး တိုက်ပွဲဝင်နေပေမယ့် ကာလတစ်ခုကြာရှည်လာတဲ့အခါ နေရေးစားရေးတွေက ပိုမိုကျပ်တည်းလာပါတယ်။

PDFတွေက လွတ်မြောက်နယ်မြေမှာ စစ်ပညာသင်ကြားပြီး တော်လှန်နေကြပေမယ့် ငွေကြေးအင်အား မပြည့်စုံတာ ကြောင့် ပြည်သူတွေရဲ့ လှူဒါန်းထောက်ပံ့မှုတွေနဲ့ပဲ နေထိုင်ရပ်တည်နေရတယ်။

တောထဲမှာဖြစ်သလိုနေထိုင်စားသောက်ပြီး ပြည်သူတွေလှူဒါန်းတဲ့ ရိက္ခာငွေကြေးကို တော်လှန်ရေးအတွက်အရေးပါတဲ့ လက်နက်ခဲယမ်းနဲ့ စစ်လက်နက်ပစ္စည်းတွေရရှိဖို့အတွက်သာ ဦးစားပေးရတာကြောင့် တစ်ကိုယ်ရေတစ်ကာယ သုံးစွဲဖို့ လိုအပ်တာတွေရှိတဲ့အခါ မိသားစုတွေ သူငယ်ချင်းအပေါင်းအသင်းတွေဆီက မျှဝေတောင်းခံလို့ ဖြေရှင်းကြရတယ်။

ဒီလိုအခက်အခဲကို အမျိုးသမီး PDFတစ်ဦးဖြစ်တဲ့ မစုမြတ်လည်းကြုံရပါတယ်။

သူနေထိုင်ရာ လွတ်မြောက်နယ်မြေက ပြည်သူ့ကာကွယ်ရေးတပ်ဖွဲ့ကလည်း အစစအရာရာလိုအပ်ချက်တွေရှိတော့ ပြည်သူတွေ လှူဒါန်းတဲ့ငွေကြေးတွေကို တော်လှန်ရေးတိုက်ပွဲဝင်ဖို့အတွက်သာ အဓိကအသုံးပြုတဲ့အခါ ကိုယ့်တစ်ကိုယ် ရည်စာ အသုံးပြုရမယ့်ကိစ္စရပ်တွေမှာ အခက်အခဲရှိလာတယ်။

” ရှေ့တန်းမသွားရတဲ့အချိန်ဆို ဘာအလုပ်မှလည်း မယ်မယ်ရရမရှိဖြစ်တယ်။ နောက်တစ်ကိုယ်ရေတစ်ကာယ အသုံးလို တာတွေ ဆပ်ပြာတို့ဘာတို့သုံးစရာတွေလိုတဲ့အခါကျရင် ငွေဝင်ကလည်းမရှိတော့ တစ်ခုခုလုပ်မယ်လို့စဉ်းစားမိတာ” လို့ မစုမြတ်က ပြောပါတယ်။

ဒီလိုအခက်အခဲတွေကို ဖြေရှင်းဖို့ မစုမြတ်က လမ်းစတစ်ခုရှာဖွေခဲ့တယ်။

လက်မှုပညာလေးတွေဝါသနာပါတဲ့ မစုမြတ်က အာဏာမသိမ်းခင်က မြန်မာ့အသံ Myanmar National Symphony Orchestra တီးဝိုင်းက တူရိယာတီးခတ်သူတစ်ဦးပါ။ အာဏာသိမ်းမှုကိုဆန့်ကျင်တဲ့အနေနဲ့ Orchestra တီးဝိုင်းကနေCDM ပြုလုပ်ခဲ့ပြီး လေးလပိုင်းအကုန်မှာ အာဏာရှင်ကိုတော်လှန်ဖို့ လွတ်မြောက်နယ်မြေကို ရောက်လာခဲ့တယ်။

လွတ်မြောက်နယ်မြေမှာ အာဏာရှင်ကိုတော်လှန်ဖို့ စစ်ပညာလေ့ကျင့်သင်ယူရင်းအားလပ်တဲ့အချိန်မှာ အကျိုးရှိတာ တစ်ခုခုလုပ်ဖို့တွေးမိတယ်။

ဒါပေမယ့် လုံခြုံရေးအခြေအနေတွေကြောင့် စခန်းပြောင်းရွှေ့ရတာ၊ တိုက်ပွဲတွေကြောင့် အခြားနေရာတွေ ပြောင်းရွှေ့နေ ထိုင်ရတာတွေကြောင့် အကောင်အထည်မဖော်ဖြစ်ခဲ့။

စခန်းပြောင်းရွှေ့နေထိုင်ရင်း မစုမြတ်တို့ PDF စခန်းက ဆေးမှူးကရင်အမျိုးသမီးတွေ ယက်ကန်းယက်တာ ကိုတွေ့တာကနေ လက်မှုပညာကို ဝါသနာပါသူပီပီ သူလည်းယက်ကန်းပညာကို သင်ယူခဲ့တယ်။ သင်ယူနေရင်း ကိုယ်တိုင်လုပ်တဲ့ လက်မှုထည်လေးတွေထွက်လာတဲ့အခါ ဒါတွေကိုရောင်းချပြီးဝင်ငွေရှာဖို့ ကြိုးပမ်းခဲ့တယ်။

မြို့နဲ့အလှမ်းဝေးတဲ့ တောထဲတောင်ထဲမှာ ဘာမှအလွယ်တကူ ဝယ်လို့မရတော့ ယက်ကန်းထည်တွေ ယက်လုပ်ဖို့ရာ ယက်ကန်းစင်တွေ ခုံတွေကအစ ကိုယ်တိုင်ပဲပြင်ဆင်ကြိုးပမ်းရတယ်။ စခန်းကအဖွဲ့ဝင်တစ်ချို့ အကူအညီနဲ့ ဝါးတွေခုတ် ယူပြီး ယက်ကန်းစင်လုပ်ဆောင်ရသလို ယက်ကန်းယက်ရာမှာ အသုံးပြုတဲ့သစ်သားပြားတွေကအစ ကိုယ်တိုင် ကော်ပတ်စားရတယ်။

ယက်ကန်းစင်လေးအကောင်အထည်ပေါ်လာတဲ့ခါ ချည်အခင်တွေဝယ်ယူပြီး ချည်ငင်တာ၊ဂွင်ပြန်ချတာ၊ယက်ကန်း ယက်တာတွေကို အားလပ်ချိန်တွေမှာ ပြုလုပ်ခဲ့တယ်၊ ကရင်ရိုးရာဒီဇိုင်း ပုဝါ၊ လွယ်အိတ် စတာလေးတွေကို ယက်လုပ်ပြီး လက်ခတ်သံ အမည်နဲ့ လူမှုကွန်ရက်မှာ ပြီးခဲ့တဲ့ ဇန်နဝါရီလကစတင်ရောင်းချခဲ့တယ်။

မစုမြတ်ရက်လုပ်ထားတဲ့ ရိုးရာလက်ရက်ကန်းထည်လေးတွေက ပစ္စည်းအမယ် မများ၊ ဒီဇိုင်းဆန်းဆန်းမဟုတ်ပေမယ့် လည်း အာဏာရှင်ကိုတော်လှန်တဲ့ PDF အမျိုးသမီးတစ်ဦး ပြုလုပ်ရောင်းချတာကြောင့် လူစိတ်ဝင်စားအားပေးခဲ့ကြပါ တယ်။

” ဟန်းမိတ်တွေကိုစိတ်ဝင်စားတော့ ဒါလေးသင်ဦးမှပဲဆိုပြီး သင်တာ၊ ပြီးတော့ယက်တယ်။ ဒီလောက်ထိ အားပေးမယ်လို့ လည်း မထင်ဘူး။” လို့ မစုမြတ်ကပြောတယ်။

လူအများစိတ်ဝင်စားပြီး ရိုးရာလက်မှုထည်လေးတွေမှာယူကြပေမယ့် မစုမြတ်တစ်ဦးတည်း ယက်လုပ်တာဖြစ်တဲ့အတွက် အချိန်ကြန့်ကြာတာမျိုးရှိတယ် လို့ဆိုပါတယ်။

မစုမြတ်က နောက်တန်းမှာနေရတဲ့အချိန် လေ့ကျင့်ရေးတွေနဲ့ အခြားတာဝန်တွေပြီးတဲ့အခါတိုင်း ယက်ကန်းယက်တာ တွေ လုပ်ပါတယ်။ လက်မှုထည်တွေက အသေးစိတ်ယက်လုပ်ရတာဖြစ်တဲ့အတွက် ပုဝါတစ်ထည်ဆို သုံးရက်ခန့်အချိန်ပေးပြီး လွယ်အိတ်ဆိုရင်တော့ လေးရက်အချိန်ပေးရတယ်လို့ဆိုပါတယ်။

” ချည်ကလည်း ကိုယ့်ဟာကိုလုံးရတယ်။ ညဘက်မယက်နိုင်ဘူးလေ။ တခါတလေညပိုင်းမီးမထွန်းရတဲ့အချိန်ဆိုရင်။ အခြေ အနေမကောင်းတဲ့ခါ အဲ့ကျရင် ရက်ပိုကြာသွားတယ်။”လို့ မစုမြတ်ကပြောတယ်။

လက်ခတ်သံကနေ ရိုးရာလွယ်အိတ်နဲ့ ပုဝါဒီဇိုင်းနှစ်မျိုးသာ ရက်လုပ်နိုင်သေးပေမယ့် အခြားလက်မှုအထည်လေးတွေကို လည်း ယက်လုပ်ပြီး ဆက်လက်ရောင်းချသွားမယ်လို့ မစုမြတ်ကပြောပါတယ်။

လက်ရှိရောင်းချနေတဲ့ရိုးရာလွယ်အိတ်နဲ့ပုဝါလေးတွေက ဒီဇိုင်းပေါ်မူတည်ပြီး တစ်သောင်းကနေ တစ်သောင်းခွဲကျသင့် ပေမယ့် ဝယ်ယူသူအများစုက တော်လှန်ရေးအတွက် အားပေးချင်တဲ့စိတ်နဲ့ အရေအတွက်များများမှာယူကြသလို ကျသင့် တဲ့ ဈေးနှုန်းထက်ပိုပေးတာတွေလည်း ရှိတယ်လို့ မစုမြတ်ကပြောပါတယ်။

ဒါပေမယ့်လွတ်မြောက်နယ်မြေဖြစ်တဲ့ တောထဲမှာလုပ်ဆောင်ရတာဖြစ်တဲ့အပြင် PDF တစ်ဦး လုပ်ဆောင်တာ ဖြစ်တော့ နှစ်ဦးနှစ်ဖက်လုံခြုံရေးကိုသတိထားရတယ်လို့ မစုမြတ်ကပြောပါတယ်။

ဒါ့အပြင် သွားရလာရတာဝေးလံတဲ့အတွက်ကြောင့် အော်ဒါတွေကို ရက်ထားပြီးလက်မှုထည်လေးတွေကို စုပြီးမှ ဝယ်သူ တွေဆီ တစ်ခါတည်းပို့ဆောင်ပေးသလို၊ လိုအပ်တဲ့ ချည်ခင်တွေဝယ်ယူရမှာလည်း တခါတည်းနဲ့အများအပြား ဝယ်ယူတာ တွေပြုလုပ်ထားရတယ်လိ့ု မစုမြတ်ကပြောပါတယ်။

” အခက်အခဲကတော့ပစ္စည်းပို့တာယူတာ။ တောထဲကနေသွား၊ လမ်းတစ်ဝက်ကို တခြားနေရာကနေတစ်ဆင့် တစ်ယောက် ကလာ။ မြို့ပေါ်မှာလည်း ပစ္စည်းပို့တာ၊ ယူတာခက်လို့ ပို့စရာတွေကိုတစ်ခါတည်းပို့ရ ယူရတာပေါ့။”လို့ မစုမြတ်က ပြောပါ တယ်။

လွတ်မြောက်နယ်မြေမှာအာဏာရှင်ကို တော်လှန်နေပေမယ့် လိုအပ်ချက်တွေများလွန်းတဲ့အခါ ပြည်သူတွေဆီက အမြဲ အလှူမခံချင်တာကြောင့် လက်ခတ်သံကို စတင်ခဲ့တာဖြစ်ပြီး ရရှိတဲ့ငွေကြေးတွေကိုလည်း တော်လှန်ရေးအတွက် လိုအပ် တဲ့နေရာတွေမှာလည်း မျှဝေသုံးစွဲသလို ငွေကြေးခက်ခဲတဲ့ အခြားရဲဘော်တွေကိုလည်း ထောက်ပံ့နိုင်ခဲ့တယ်လို့ မစုမြတ် ကဆိုတယ်။

ရိက္ခာငွေကြေးလိုအပ်ချက်က လွတ်မြောက်နယ်မြေမှာတော်လှန်နေတဲ့ PDF အဖွဲ့တွေတော်တော်များများလည်း ကြုံတွေ့ နေရတဲ့ကိစ္စဖြစ်တဲ့အတွက် ဒီအခက်အခဲကို စာနာနားလည်ပြီး ဒီအတွက်လည်း စိတ်ဓာတ်မကျဖို့လိုတယ်လို့ မစုမြတ်က ပြောပါတယ်။

” ဒီလိုကြုံနေရတဲ့ ရဲဘော်တွေကို အားတင်းထားပါလို့ပြောချင်တယ်၊ ရဲဘော်အချင်းချင်းကူညီလို့ရအောင် လုပ်နေတာဖြစ် တော့အားတင်းထားပါ”လို့ မစုမြတ်ကပြောပါတယ်။

မစုမြတ်က တော်လှန်ရေးအတွက် ငွေကြေးအထောက်အပံ့တစ်ခုရအောင်လုပ်ဆောင်နေတာဖြစ်တော့ အခြေအနေပေါ်မူ တည်ပြီး လက်မှုယက်ကန်းထည်တွေရက်လုပ်ရင်း တော်လှန်ရေးအတွက် တစ်တပ်တအား ပါဝင်သွားမယ်လို့ ဆိုတယ်။

” အခြေအနေကမကောင်းဘူးဆိုလည်း ဒီဟာကို ခဏရပ်ရင်လည်း ရပ်ရမှာပေါ့နော့် ဘယ်လိုဆက်ဖြစ်လာမလဲ မသိဘူး။ လုပ်လို့ရသလောက်လုပ်ပြီး ကူညီလို့ရသလောက်ကူညီမယ်လို့တော့တွေးထားတယ်”လို့ မစုမြတ်က ပြောပါတယ်။

ငွေကြေးလိုအပ်ချက်အတွက် အာဏာရှင်ကိုတော်လှန်ရင်းတစ်ဖက်မှာ ငွေကြေးရှာဖွေပေမယ့်လည်း တော်လှန်ရေး အတွက်တော့ ဘယ်တော့မှ လက်လျှော့မှာ မဟုတ်ဘဲ အာဏာရှင် အမြစ်မပြတ်မချင်း တော်လှန်ရေးမှာ ပါဝင်သွားမယ်လို့ မစုမြတ်ကဆိုပါတယ်။