ဒီနေ့လူမှုကွန်ယက်စာမျက်နှာပေါ်ရောက်လာတဲ့ ဘီးဆံပတ်

ဓါတ်ပုံ credit: သမ္မတရုံး လူမှုကွန်ယက်စာမျက်နှာ

မယ်လွန်း။ ။

စင်္ကာပူနိုင်ငံမှာပြုလုပ်မယ့် ၃၂ ကြိမ်မြောက် အာစီယံထိပ်သီး အစည်းအဝေးတက်ရောက်ဖို့ သွားတဲ့ နိုင်ငံတော် သမ္မတ ဦးဝင်းမြင့်ကို နေပြည်တော် လေဆိပ်မှာ ဇနီးဖြစ်သူနဲ့ နိုင်ငံတော် အကြီးအကဲတွေ လိုက်ပါပို့ဆောင်နေကြတဲ့ ပုံတွေဟာ နိုင်ငံတော် သမ္မတရုံး လူမှုဆက်သွယ်ရေး ကွန်ရက် Facebook စာမျက်နှာကတဆင့် ပြန့်နှံ့သွားခဲ့ပါတယ်။ နိုင်ငံတော် သမ္မတရဲ့ ပထမဆုံး ပြည်ပခရီးစဉ်ကို လိုက်ပါပို့ဆောင်နေကြသူတွေထဲက အမျိုးသမီးတဦးရဲ့ ပုံကိုကြည့်ပြီး ဝေဖန်သူတွေတချို့ကြားမှာ ကန်ရေပြင်ထဲ ခဲငယ်လေးပစ်ချလိုက်သလို ဂယက်ထခဲ့ပါသေးတယ်။ အဲဒါကတော့ First Lady လို့ခေါ်တဲ့ သမ္မတကတော်ရဲ့ ဝတ်စားဆင်ယင်မှုနဲ့ သူ့ရဲ့အပြင်အဆင်ပါပဲ။

အနောက်တိုင်းဝတ်စုံကို စမတ်ကျကျ ဝတ်ဆင်ထားတဲ့ သမ္မတ ဦးဝင်းမြင့်ရဲ့ ဘေးမှာ လိုက်ပို့တဲ့ သမ္မတ ကတော်က ဦးခေါင်းက ဆံပင်တွေကို ဘီးဆံပတ် ပတ်ထားပြီး မျက်နှာမှာလည်း သနပ်ခါးရေကျဲလိမ်းထားပါတယ်။ ဝတ်စားဆင်ယင်ပုံမှာလည်း မြန်မာဆန်ဆန် ရင်ဖုံးအင်းင်္ကျီ နဲ့ ပုဝါပါးပါးကို ပုခုံးထက်တင်ထားပြီး အပွင့်ရိုက် ထဘီနဲ့ ကတီပါ ညှပ်ဖိနပ် ပါးပါးလေးကို စီးထားပါတယ်။ ဒီဓာတ်ပုံတွေကို ကြည့်ပြီး First Lady ဒေါ်ချိုချိုအပေါ် သူ့ရဲ့ ရိုးရှင်းတဲ့အသွင်အပြင်ကို သဘောကျနှစ်သက်တဲ့သူတွေ၊ အထူးပြု ပြောဆိုသူတွေရှိသလို လူတွေပုံမှန်လက်ခံထားတဲ့ ဒီနေ့ခေတ်ရဲ့ ဖက်ရှင်မကျတဲ့ အပြင်အဆင် ကြောင့် “ထက်မြက်ပြီး စတိုင်ကျတဲ့ First Lady” အလိုရှိကြောင်း သရော်သူတွေလည်း ရှိခဲ့ပါတယ်။

လူတကိုယ်အကြိုက်တမျိုးမို့ ရိုးတဲ့ဝတ်စားဆင်ယင်မှု အပြင်အဆင်ကို ကြိုက်နှစ်သက်သူတွေရှိသလို နိုင်ငံ တကာနဲ့ယှဉ်ပြီး စမတ်ကျတဲ့အပြင်အဆင်မျိုးကို ကြိုက်နှစ်သက်သူတွေလည်း ရှိကြတာ သဘာဝပါ။ ဒီနေရာမှာ အလှအပ အပြင်အဆင် ဖက်ရှင်အကြောင်း အဓိက ပြောချင်တာမဟုတ်ပါဘူး။ ဒါပေမဲ့ အဲဒီလို ပုဂ္ဂလိကဆိုင်ရာ လက်ခံမှုက အမျိုးသမီးတွေ ထိပ်ပိုင်းနေရာကို ရောက်လာပြီဆိုရင် နှိုင်းယှဉ်စရာ စံနှုန်းတခုဖြစ်လာတာကတော့ ဆွေးနွေးစရာအကြောင်းအရာဖြစ်လာပါတယ်။

ဥပမာ နိုင်ငံပြယုဂ်အဖြစ် ခေါင်းဆောင်ဆိုရင် စတိုင်ကျဖို့နဲ့ ထက်မြက်ဖို့အဓိကဆိုပြီး တွဲပြောတဲ့သူရှိပေမယ့် ထက်မြက်ပြီး ဖက်ရှင်ကျတဲ့ အမျိုးသမီးခေါင်းဆောင်ဖြစ်တော့ရော အပြောလွတ်ပြီလားလို့ ကြည့်လိုက်ရင် မလွတ်ပြန်ပါဘူး။ တပွဲတမျိုးမရိုးတဲ့ ဝတ်စားဆင်ယင်မှု၊ ပြင်ဆင်မှုတွေနဲ့ စမတ်ကျလှတဲ့ နိုင်ငံတော် အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည်က ဒီနေရာမှာ ရှင်းလင်းတဲ့ ဥပမာပါပဲ။ သူဟာ အတွေးအခေါ်နဲ့ ဉာဏ်ရည် ပိုင်းမှာ သူမတူအောင် ထက်မြက်သူတဦးဆိုတာ လူအများစုလက်ခံသလို နှလုံးရည်၊ ခံနိုင်ရည်ပိုင်းကို ကြည့်ရင် လည်း စံနမူနာထားရမယ့်သူဆိုတာ အထင်အရှားပါ။ တခြားခေါင်းဆောင်တွေနဲ့ယှဉ်ရင် အပြစ်ပြောစရာ ကြံဖန်ရှာမှ တွေ့ရမှာပါ။ ဒါပေမဲ့ သူလည်း ဝေဖန်မှုတွေက မလွတ်ပါဘူး။ ဝေဖန်တယ်ဆိုတာထက် ပစ်မှတ် လုပ်ပြီး တိုက်ခိုက်ခံရတာလို့လည်း ပြောနိုင်ပါတယ်။ ဘာနဲ့လဲဆိုတော့ ဒီအလှအပ အပြင်အဆင်ကိစ္စနဲ့ပါပဲ။

စစ်အာဏာရှင်လက်အောက် လွန်ခဲ့တဲ့ ဆယ်စုနှစ်များဆီကို အမှတ်ရမိပါသေးတယ်။ ဒေါ်အောင်ဆန်းစုကြည် ဦးဆောင်တဲ့ NLD ပါတီကို တိုက်ခိုက်ဖို့၊ ရှုတ်ချဖို့ လုပ်ရာမှာ ဒေါ်အောင်ဆန်းစုကြည်ရဲ့ အလှအပကြိုက်တဲ့ အကြောင်းကို ဖွဲ့နွဲ့ဝေဖန်တိုက်ခိုက်ထားတဲ့ စာအုပ်တောင် ဖတ်ဖူးပါသေးတယ်။

ဒါဟာ စစ်အာဏာရှင်ဘက်က တိုက်ခိုက်မှုပဲလားဆိုတော့ မဟုတ်ပြန်ပါဘူး။ နိုင်ငံရေးအသိုင်းအဝိုင်းအကြား အမြင်မတူသူ နိုင်ငံရေးသမား၊ တော်လှန်ရေးသမားတွေကြား၊ သတင်းမီဒီယာသမားအချို့တွေကြားနဲ့ သာမန်လူ တွေကြားမှာလည်း ဒေါ်အောင်ဆန်းစုကြည်ကို ဝေဖန်ချင်ပြီဆိုရင် သူအလှအပကြိုက်တဲ့အကြောင်းနဲ့ သူ့ရဲ့ ဝတ်စုံဖက်ရှင်တွေအကြောင်းကတော့ မပါမဖြစ် ထိပ်ဆုံးကပါပဲ။

ဒီနေရာမှာ ခေါင်းဆောင်နေရာယူတိုင်း သူတို့ရဲ့ လှုပ်ရှားမှုမှန်သမျှ လူတွေစောင့်ကြည့်ကြမှာပဲလို့ ယေဘုယျ ဆန်ဆန် တုံ့ပြန်ကြမှာ အသေအချာပါပဲ။ ဒါပေမဲ့ အမျိုးသားတွေမှာလည်း သူတို့နည်း သူတို့ဟန် အလှအပ ကြိုက်တဲ့ အနေအထားကတော့ ရှိကိုရှိပါတယ်။ ဥပမာ – ထိပ်ပြောင်နေရင် ကြည့်လို့မကောင်းဘူး ဆိုပြီး မရှိရှိတဲ့ အနောက်က၊ ဘေးက ဆံပင်တွေကို နဖူးပေါ် အတင်းဆွဲတင်ထားတဲ့သူတွေလည်း ခေါင်းဆောင်ထဲမှာ ရှိတာပါပဲ။ ဒီထဲမှာ ဖိနပ်၊ ဘောင်းဘီရှည်၊ လုံခြည်၊ တိုက်ပုံ၊ နာရီ၊ လက်စွပ်၊ စသဖြင့် လူ့အသိုင်းအဝိုင်းက ပုံမှန်သတ်မှတ်ပေးထားတဲ့ အမျိုးသားတွေ ပြင်အပ်ဆင်အပ်တဲ့ အပြင်အဆင်တွေ၊ အလှအပတွေနဲ့အညီ နေထိုင်ကြိုက်နှစ်သက်သူတွေရှိတာပဲ။ ဒါကို စာဖွဲ့ပြီး ဘယ်သူတွေပြောနေလဲဆိုတာ ပြန်စဉ်းစားရင်တောင် လက်ချိုးရေတွက်လို့ရတဲ့ အရေအတွက်ထက်တောင် နည်းနေတာ တွေ့မှာပါ။ အမျိုးသားခေါင်းဆောင်တွေဆို ရင် တိုက်ပုံနဲ့ ပုဆိုး၊ ကုတ်အင်္ကျီနဲ့ ဘောင်းဘီရှည်၊ ဒီလောက်ဝတ်ထားရင် စမတ်ကျပြီ၊ ခန့်ညားပြီလို့ သာမန်ပဲ သတ်မှတ်ကြသလို အချိန်အများစုမှာ အမျိုးသားတွေ ဘယ်လိုဝတ်စားဆင်ယင် ပြင်ဆင်နေထိုင်လဲ ဘယ်သူမှ တောင် သတိထားမိပုံ မပေါ်ပါဘူး။ ဒါပေမဲ့ အမျိုးသမီးခေါင်းဆောင်တဦး ဝတ်စားပြင်ဆင်လာပြီဆိုရင် ခေါင်း အစ ခြေအဆုံး လူတဦးချင်းစီအကြိုက်အပေါ် မူတည်ပြီး တယောက်တမျိုး ဝေဖန်ကြပါတော့တယ်။

ပြိုင်ဘက်တွေဆိုရင်တော့ အဲဒါကို လက်နက်တခုလို အသုံးချပြီးတောင် တိုက်ခိုက်တတ်ကြပါမယ်။ ဥပမာ – ပုံမှန် မြန်မာဝတ်စုံဝတ်ရင်တောင် ဒီဝတ်စုံဖိုးက ဘယ်လောက်၊ ချုပ်ထားတဲ့ဒီဇိုင်းကလည်း အရွယ်နဲ့မလိုက် ဆိုပြီး ခေတ်ရှေ့လွန်နေသလိုလို အနေအထိုင် လျှပ်ပေါ်လော်လီသလိုလို ပြောကြတာတွေရှိသလို ကိုယ့်စံနှုန်းနဲ့ မကိုက်ညီတဲ့ အပြင်အဆင်ဆိုရင်လည်း ပုံတုံးလိုက်တာ၊ တောပုံကြီး စသဖြင့် ရိုးအ,တုံးလွန်းပြီး မထက်မြက်တဲ့ အမျိုးသမီးတယောက်အနေနဲ့ ပုံဖော်ဝေဖန်ကြတာတွေပါ။

ပုဂ္ဂလိကဆိုင်ရာ လက်ခံမှုတွေထဲတခုဖြစ်တဲ့ အလှအပနဲ့ ဖက်ရှင်ဟာ အမျိုးသမီးတွေ ခေါင်းဆောင်နေရာကို ရောက်လာတော့မယ်ဆိုရင် အမျိုးသားခေါင်းဆောင်တွေ မကြုံရတဲ့ဝေဖန်မှုတွေထဲက ထူးဆန်းပေမယ့် မထူး ဆန်းတဲ့ ဝေဖန်မှုတခုပါပဲ။ ဒီဝေဖန်မှုတွေကို သာမန်ဖြစ်စဉ်တခုလို အပေါ်ယံမြင်နေရပေမယ့် တကယ်တမ်းကျ တော့ အမျိုးသမီးခေါင်းဆောင်တွေရဲ့ နိုင်ငံရေးဦးဆောင်မှုအခန်းကဏ္ဍအတွက်တော့ ပျားရည်ခွက်ထဲက အဆိပ် တစက်ပါပဲ။

သာမန်အမျိုးသမီးတွေကတော့ ဒါတွေကို စိတ်အနှောက်အယှက်ဖြစ်စရာ အမှိုက်တစလို့သာ သဘောထား နိုင်ပေမယ့် အဲဒီအမျိုးသမီးဟာ နိုင်ငံရေးမှာ ခေါင်းဆောင်မှုတနေရာ ရလာရင်တော့ သူ့ကို တရစပ်တိုက်ခိုက်ဖို့ လက်နက်တခုဖြစ်လာနိုင်ပါတယ်။

လူ့အဖွဲ့အစည်းမှာ အမျိုးသမီးခေါင်းဆောင်တွေကိုဆိုရင် သူတို့ရဲ့ ပုဂ္ဂလိကဆိုင်ရာ လက်ခံမှု၊ ကြိုက်နှစ်သက်မှု အပေါ်ကိုသာ ဝေဖန်တိုက်ခိုက်ဖို့ လက်နက်တခုအဖြစ် အသုံးပြုနေတာဟာ လူ့အသိုင်းအဝိုင်းတခုရဲ့ ကျား၊မ တန်းတူရေးဆိုင်ရာ လက်ခံကျင့်သုံးမှုအတိုင်းအတာနဲ့ ဂုဏ်သိက္ခာအဆင့်အတန်းတခု နိမ့်ကျ၊ ကျရှုံးနေဆဲ ဆိုတာ မီးမောင်းထိုးပြနေပါတယ်။

ဒီလိုအလေ့အထတွေဟာ ကျားမတန်းတူရေးဆိုင်ရာ ဂုဏ်သိက္ခာကျဆင်းနေသေးတဲ့ မြန်မာ့လူ့အသိုင်းအဝိုင်းရဲ့ ခေါင်းဆောင်မှုအခန်းကဏ္ဍမှာ ပါဝင်နေတဲ့အမျိုးသမီးတွေအတွက်လည်း မတရားတဲ့ စိန်ခေါ်မှုတခုအဖြစ် ရှိနေ သေးတာ ဝမ်းနည်းစရာကောင်းပါတယ်။

အမျိုးသမီးတယောက်ကိုကြည့်ရင်၊ အထူးသဖြင့် အမျိုးသမီးခေါင်းဆောင်တယောက်ကို ရှုမြင်သုံးသပ်တဲ့အခါ သူတို့ရဲ့ ပုဂ္ဂလိကဆိုင်ရာ လက်ခံမှုကို ဘေးဖယ်ပြီး အမျိုးသားခေါင်းဆောင်တွေကို မြင်သလိုပဲ ခေါင်းဆောင် တယောက်မှာ ရှိသင့်တဲ့ အချက်တွေနဲ့ပဲ စံသတ်မှတ်သင့်ပါတယ်။

သမ္မတကတော် ဒေါ်ချိုချိုဟာ တခြားသော နိုင်ငံတွေက First Lady တွေလို လူမှုရေး၊ ပညာရေးနဲ့ အခြား နိုင်ငံရေးဆိုင်ရာကဏ္ဍတွေမှာ သမ္မတနဲ့ နိုင်ငံကို ဘယ်လိုအထောက်အပံ့ပေးမလဲဆိုတဲ့ ဝေဖန်မှုမျိုးနဲ့ ချဉ်းကပ် တာက ပိုပြီးထိရောက်အဆင့်မြင့်တဲ့အတွေးအခေါ်တရပ်ဖြစ်မှာပါ။ အဲဒီလိုမဟုတ်ပဲ လူတယောက်ရဲ့ စိတ်ဓာတ်၊ လုပ်ရပ်နဲ့ ရပ်တည်မှုထက်ပိုပြီး အပေါ်ယံဆင်ယင်မှုနဲ့ အလှအပ၊ အသွင်သဏ္ဍန်ကို ပစ်မှတ်ထား ဝေဖန်တတ်တဲ့ အလေ့အထ နိုင်ငံအဆင့်ထိ ရောက်လာတာကတော့ လူ့အသိုင်းအဝိုင်းတခုရဲ့ အတွေးအခေါ် ကျရှုံးမှုတခုပါပဲ။

အဲဒါကြောင့် သမ္မတကတော် ဒေါ်ချိုချိုတယောက် ခေါင်းမှာ ဘီးဆံပတ်နဲ့ နေထိုင်သွားလာတာဟာ ဘာများ မှားနေလို့လဲလို့ မေးခွန်းထုတ်လိုက်ရပါတယ်။