မြစ်ကြီးနားဂျာနယ်နှင့် ကချင်ပြည်မှအမျိုးသမီးများအသံ

ဒီမိုကရေစီရေး ပြုပြင်ပြောင်းလဲမှုများအတွင်းမှာ သတင်းမီဒီယာများလည်း လွတ်လပ်ခွင့်အချို့ ရရှိလာခဲ့ကြသည်။ ယခင်က သတင်းစာမရောက်သည့် ဒေသများ၊ ဒေသ အတွင်း သတင်းတင်ပြမှုများ အားနည်းခဲ့သည့်ဒေသများတွင် သတင်းဂျာနယ်များလည်း ပေါ်ထွန်းလာခဲ့သည်။ ယင်းတို့အထဲတွင် ကချင်ပြည်နယ်၊ မြစ်ကြီးနားမြို့မှ ထုတ်ဝေသော မြစ်ကြီးနားဂျာနယ်သည်လည်း တစ်ခုအပါအဝင်ဖြစ်သည်။ ထိုအပြောင်းအလဲသည် အမျိုးသမီးများအပေါ် သက်ရောက်မှုရှိပါသလား။ Honest Information က သတင်းထောက် “ကချင်မလေး”က အမျိုးသမီးအချု့ိ၏ အမြင်များကိုမေးမြန်းထားပါသည်။

ဒေါ်ဂျာခေါန် (MungChyingRawtJat)

ဒေါ်ဂျာခေါ်န်သည် မြစ်ရေကာတာစီမံကိန်းကြောင့် ရွှေ့ပြောင်းခံထားရသူဖြစ်ပြီး မြစ်ဆုံအရေးနှင့် ပတ်သက်၍ တက်ကြွလှုပ်ရှားသူ (MungChyingRawtJat) အဖွဲ့ဝင်တစ်ဦးလည်း ဖြစ်သည်။

သူမသည် သားသမီး(၈)ဦး၏ မိခင်ဖြစ်သည့်အပြင် သတင်းစာစောင်များ၊ စာအုပ်စာပေများကို အင်မတန် မြတ်နိုးစွာဖတ်ရှုသူဖြစ်သည်။ သတင်းစာစောင်များ ဖတ်ရာတွင် သူမ၏ အားလပ်ချိန်တခဏအတွင်း အမြန်ဖတ်ရှုရကြောင်းကို“ ကိုယ်က အမျိုးသမီးဖြစ်တဲ့အလျောက် အိမ်မှုကိစ္စများမြောင်လှတယ်၊ ဆိုတော့ စာစောင် ဖတ်ဖို့ဆိုလို့ရှိရင် အချိန်လုရတယ်၊ ကိုယ်ဖတ်ချင်တဲ့ စာစောင်ကို ကိုယ့်အိတ်ထဲအဆင်သင့်ထည့်ပြီး နားပြီဆိုတာနဲ့ ချက်ချင်းကောက်ဖတ်တယ်”လို့ပြောပါသည်။

သူမအနေနဲ့ ယခုနောက်ပိုင်းတွင် စာဖတ်ချိန်ကို သီးသန့်ထားရှိကြောင်းကို“ စာဖတ်မှပဲဗဟုသုတရနိုင်မှာ၊ ပတ်ဝန်းကျင်၊ အသင်းတော်မှာလည်း အသိဖလှယ် နိုင်မှာဆိုတဲ့အချက်တွေကြောင့် မနက်စောစောထပြီး နာရီဝတ်လောက် အချိန်ပေးပြီးဖတ်တယ်” လို့ပြောပါသည်။

သတင်းစာဖတ်ခြင်းအားဖြင့် ကချင်ပြည်နယ် အတိုင်းအတာအရ ဖြစ်ပျက်နေသောအကြောင်းအရာများ၊ နိုင်ငံရေးအခြေအနေများ၊ အစိုးရအသစ်အကြောင်းများ ကို စဉ်ဆက်မပြတ် ဖတ်ရှုခြင်းဖြင့် သိနိုင်ကြောင်းလည်း ပြောပါသည်။ ထို့အပြင် အိမ်ရှင်မများအတွက် ကုန်ဈေးနှုန်းများအကြောင်းနှင့် ကျန်းမာရေးနှင့် ပတ်သက်၍ လည်း စာစောင်များမှ ဖတ်ရှုရကြောင်းကို ပြောပြသည်။

“ စာဖတ်ခြင်းဟာ အိမ်တအိမ်ရဲ့ ပြတင်းပေါက်နဲ့တူတယ်၊ စာမဖတ်လို့ရှိရင် အသိပညာ အလင်းမရပဲ မှောင်မိုက်နေမှာပဲ။ အဲဒါကြောင့် ကျမပတ်ဝန်းကျင်က အမျိုး သမီးများအားလုံးကို စာဖတ်ဖို့ အမြဲတိုက်တွန်းဖြစ်ပါတယ်” လို့ပြောပါသည်။

မြစ်ကြီးနားဂျာနယ်ထွက်ရှိသည့်အပေါ် သူမ၏ခံစားချက်ကို အခုလို“ ကချင်ပြည်နယ် အတိုင်းအတာအဖြစ် ကိုယ်စားပြုပြီး ပထမဆုံး ထွက်ရှိတဲ့ သတင်းစာစောင် ဖြစ်တဲ့အတွက် ရင်ထဲက အူလှိုက်သည်းလှိုက်ကို ကြိုဆိုဝမ်းသာမိပါတယ်” ၊ “ အရင်က တစ်လမှ တစ်စောင်ထွက်ရာကနေ အခုဆိုတစ်လအတွင်း သုံးစောင်အထိ တိုးပြီး ထွက်ရှိလာတဲ့အပေါ် သတင်းထောက်မှအစ၊ အယ်ဒီတာ၊ ခေါင်းဆောင်တွေအားလုံးရဲ့ ကြိုးပမ်းမှုကို မြင်ရပြီး အရမ်းဂုဏ်ယူပါတယ်” လို့ပြောပါသည်။

သူမအနေဖြင့် မြစ်ကြီးနားစာစောင်တွင် မြစ်ဆုံနှင့်ပတ်သက်ပြီး အမြဲပါလာသည့်အပေါ် ဝမ်းသာကြောင်း၊ သူမအနေဖြင့်လည်း သတင်းရင်းမြစ်များ ပေးပို့ခဲ့သည့် အပြင် သတင်းစာဖြန့်ဝေသူများကိုလည်း ကူညီပေးကြောင်းသိရသည်။ မြစ်ကြီးနားဂျာနယ်မှ သူမအကြောင်း သတင်းဆောင်းပါးထွက်ရှိလာခြင်းကြောင့် မြစ်ဆုံအရေးနှင့် ဒေသအကျိုးလုပ်ဆောင်ရာတွင် သူမအတွက် အားတက်ဖွယ်ရာဖြစ်ပြီး အထောက်အကူပြုရာရောက်ကြောင်းလည်းပြောပြခဲ့သည်။

မြစ်ကြီးနားဂျာနယ်၏ သတင်းရေးသားမှုကြောင့် ရေကာတာဆန့်ကျင်လှုပ်ရှားသူများအကြောင်းကို အများပြည်သူပိုပြီးသိရှိလာကြောင်းကို “ကျမက  စီမံကိန်း လည်း ရပ်ဆိုင်းထားပြီ ဖြစ်သည့်အလျောက် နေရပ်ပြန်ရေး၊ အရင်ကလည်းပြောင်းချင်လို့ပြောင်းခဲ့တာမဟုတ်ဘူး၊ အတင်းအဓမ္မ ပြောင်းရွှေ့ခံထားရသည့်အတွက်ကြောင့် ထောက်ပံ့ဆန်များ မယူချင်ပဲ ယူနေရတယ်ဆိုပြီး မြစ်ကြီးနာဂျာနယ်မှာ သတင်းထွက်လာတဲ့အတွက် ကျမနှင့် ကျမသူငယ်ချင်းမိသားစုက ဆန်ထောက်ပံ့မှု ရပ်တန့်ခံ လိုက်ရတယ်၊ ဒီဟာကပိုပြီးတော့ အများပြည်သူသိအောင် လုပ်ဆောင်ပေးတာဖြစ်တဲ့အတွက်ကြောင့် ကျေးဇူးတင်ပါတယ်” လို့ပြောပါသည်။

လက်ရှိ မြစ်ဆုံရေကာတာကြောင့် ပြောင်းရွှေ့ခံဒေသများအကြား သတင်းရင်းမြစ်အင်တာဗျူးနှင့် ပတ်သက်ပြီး မြစ်ကြီးနားမှ သတင်းထောက်အချို့ သတင်း လာယူသည့်အချိန် ပိုပြီးအားကောင်းလွယ်ကူစေရန် သူမအမြင်ကိုအခုလို“ ဒေသအတွင်း လူထုအကျိုးနှင့် ပတ်သက်ပြီး တစိုက်မတ်မတ်လုပ်နေသူမှအပ အခြားသော သူများက သတင်းပေးဖို့အင်မတန်မှ ခက်ခဲတယ်၊ မီဒီယာကို ထိတွေ့ဖို့ ကြောက်ရွံ့စိတ်တွေရှိနေတယ်။ အဲဒါကြောင့် သူတို့ကို မီဒီယာ၊ သတင်းထောက်တွေနဲ့ မိတ်ဆက်ပေးတဲ့ အစီအစဉ်၊ အမြင်ဖွင့်ပေးတဲ့ အစီအစဉ်လေး လုပ်ဆောင်ပေးရင်ကောင်းမယ်”  ဟုမြစ်ကြီးနားသတင်းတိုက်အား အကြံပြုခဲ့ကြောင်းပြောခဲ့သည်။

မအာလုံ (အမျိုးသမီးရေးလှုပ်ရှားတက်ကြွသူ)

မအာလုံသည် အမျိုးသမီးအရေးနှင့် ပတ်သက်ပြီး တက်ကြွလှုပ်ရှားသူတစ်ဦးဖြစ်သည်။ သူမသည် သုတစွယ်စုံစာစောင်ဖြင့် စာဖတ်ခြင်းကို စတင်မိတ်ဆက်ရာမှ သတင်းစာစောင်များ ဖတ်သည့်အထိ အကျင့်ရရှိခဲ့သည်မှာ အချိန်တော်တော်ကြာ ခဲ့ပြီဖြစ်ကြောင်းပြောပြသည်။

“ကိုယ်က သတင်း၊ စာပေကို ချစ်တဲ့အတွက်အကြောင့် စာစောင်တွေဖတ်ဖို့ သီးသန့်အချိန်ယူရတယ်လို့ မရှိဘူး၊ အားရင်အားသလို စာဖတ်တယ်”လို့ ပြောခဲ့ သည်။

သူမအနေဖြင့် လက်ရှိကချင်ပြည်နယ်တွင် ဖြစ်ပွားနေသော တိုက်ပွဲများအကြောင်း၊ ဒီမိုကရေစီစနစ်ဖြင့် ဦးဆောင်မည့်အစိုးရ ရှိလာပြီဖြစ်သည့်အတွက် ထို အစိုးရမှ ငြိမ်းချမ်းရေးဆွေးနွေးပွဲကို ဘယ်လိုဦးဆောင်သွားမလဲ၊ နိုင်ငံရေးအပြောင်းအလဲကို ဘယ်လိုအသွင်သဏ္ဍန်ဖြင့် ကူးပြောင်းမလဲဆိုသည့် အကြောင်းများကို ပိုပြီး သိရှိလိုသည့်အတွက်ကြောင့် သတင်းစာစောင်များ အမြဲဖတ်ခြင်း ဖြစ်သည်ဟုသိရသည်။

သူမအနေဖြင့် အခြားအမျိုးသမီးထုကို စာအုပ်၊ စာစောင်၊ စာပေများကို ဖတ်ဖို့ရန် အခုလို“ အလိမ္မာစာမှာရှိ ဆိုသည့်အဆိုအရ ကိုယ်သိချင်တတ်ချင်တဲ့အရာ အားလုံးက စာအုပ်စာပေ၊ စာစောင်တွေမှာ ရှိတယ်၊ ကိုယ့်နိုင်ငံကို ဦးဆောင်နေတဲ့ ခေါင်းဆောင်တွေ ဘယ်ကိုဦးတည်ပြီးသွားနေလဲဆိုတာတွေ သိချင်ရင် သတင်း စာစောင်တွေဖတ်ပါ” ။

ဆက်ပြီး သူမက ဗဟုသုတသည် အင်အား (Knowledge is Power) ဆိုသည့်အလျောက် စာစောင်တွေဖတ်ခြင်းဖြင့် ဗဟုသုတရရှိမှာဖြစ်သည်။ မိမိ ရောက်ရှိနေသည့်နေရာတွင် မိမိကိုယ်ကို ယုံကြည်မှုအပြည့်အဝရှိခြင်းအားဖြင့် ပိုပြီး ကိုယ့်ကိုတိုးတက်စေမှာဖြစ်သည်။ ဗဟုသုတက သတင်းအချက်အလက် ( Know-ledge is information) ဖြစ်သည်ဆိုသည့် အတိုင်း မိမိရရှိထားတဲ့ သတင်းအချက်အလက်တွေကို မိမိနေအိမ်၊ ပတ်ဝန်းကျင်၊ လူထုသို့  ပြန်လည်ဖြန့်ဝေနိုင်မှာ ဖြစ် သည်။ ဗဟုသုတက လုံခြုံမှု (Knowledge is security) ဆိုသည့်အလျောက်လည်း မိမိလုံခြုံမှုအတွက် မည်သည့်ဥပဒေတွေက ကာကွယ်ပေးထားသလဲဆိုတာ မသိဘူး ဆိုရင်၊ တကိုယ်တည်းအတွက်တောင် မကာကွယ်နိုင်ဘူးဆိုရင် အမျိုးသမီးများရဲ့ လုံခြုံမှုကို ဘယ်လိုမှ ကူညီနိုင်မှာ မဟုတ်သည့်အတွက် လူငယ်များ၊ အမျိုးသမီးထု အားလုံးကို စာအုပ်၊ စာပေ၊ သတင်းစာစောင်ဖတ်ရန် အားပေးလိုသည်ဟု ပြောသည်။

မြစ်ကြီးနားဂျာနယ်ထွက်ရှိသည့်အပေါ် သူမအမြင် “ မီးပွိုင့်တွေမှာ မြစ်ကြီးနားဂျာနယ်ထွက်ရှိတော့မည်ဆိုတဲ့ ကြေညာဆိုင်းဘုတ်မြင်တော့ အရမ်းဝမ်း သာတယ်၊ မြစ်ကြီးနားမြို့တခုတည်းမဟုတ်၊ ကချင်ပြည်နယ် တပြည်လုံးအတိုင်းအတာအထိ သတင်းတွေဖတ်ရတဲ့အတွက် အရမ်းဝမ်းသာတယ်” ဟုပြောပါသည်။

“ တခြားဂျာနယ်တွေဖတ်တဲ့အချိန် ကချင်ပြည်နယ်က သတင်းတွေက တစ်ပုဒ်စ၊ နှစ်ပုဒ်စပဲပါတယ်၊ ပါတဲ့အချိန်ရှိသလို မပါတဲ့အချိန်တွေလည်း အများကြီး၊ ပါလာတဲ့ သတင်းတွေကလည်း သတင်းဟောင်းတွေပဲ ပြန်ဖြစ် နေပြန်တယ်၊ မြစ်ကြီးနားဂျာနယ် ထွက်ရှိတဲ့နောက်ပိုင်းဆို အချိန်နဲ့ တပြေးညီ ကချင်ပြည်နယ်မှာ ဖြစ်နေတဲ့ အရာ တွေကို သိရလို့ အရမ်းကျေနပ်တယ်” ဟုလည်းပြောသည်။

ဒေါ် S.နန်လတ် (ဥက္ကဌ၊ အောင်မြေသစ်ကျေးရွာ၊ ဝိုင်းမော်မြို့နယ် မြန်မာနိုင်ငံအမျိုးသမီးရေးရာအဖွဲ့)

ဒေါ်S.နန်လတ်သည် ဝိုင်းမော်မြို့နယ်၊ အောင်မြေသစ်ကျေးရွာမှ မြန်မာနိုင်ငံအမျိုးသမီးရေးရာဥက္ကဌဖြစ်သည်။ သူမတို့ ကျေးရွာတွင် သတင်းတစ်ပတ် အတွင်း ထွက်ရှိသည့် စာစောင်များသည် နောက်ကျမှ ရောက်ရှိလာတတ်သည့်အလျောက် တပတ်အတွင်း ထွက်ရှိထားသည့် စာစောင်များကို ကလေးများအား ကျောင်းကြို၊ ကျောင်းပို့ပြီးသည့်အချိန်များတွင် အချိန်ယူဖတ်ရကြောင်း ပြောပြပါသည်။

သတင်းစာစောင် ဖတ်ခြင်းနှင့် မဖတ်ခြင်း၏ ခြားနားမှုကို သူမက“ သတင်းစာတွေ မဖတ်ဘူးဆိုရင် ကိုယ့်မျက်စိရှေ့၊ အိမ်နီးပတ်ဝန်းကျင် အတိုင်းအတာ လောက်ပဲ သိနိုင်တယ်၊ သတင်းဂျာနယ်တွေ ဖတ်တယ်ဆိုရင် နိုင်ငံရေး ဘယ်လိုပြောင်းလဲလာနေပြီလဲ၊ စစ်ပွဲတွေ ဘယ်ဘက်မှာပိုပြင်းထန်နေပြီလဲ၊ အခုဆို ကချင်ပြည် နယ်မှာ ဖြစ်နေတဲ့ မူးယစ်ကင်းစင်တိုက်ဖျက်ရေး(Pat Jasan) လုပ်ဆောင်ချက်တွေ ဘယ်လို၊ ဘယ်အတိုင်းတာအထိ လုပ်နေပြီလဲဆိုတာတွေကို သတင်းစာစောင် ဖတ်ခြင်းအားဖြင့် ကိုယ်တွေ့ မြင်နေရသလို သိနိုင်တယ်”လို့ ပြောပါသည်။

သူမအနေဖြင့် သတင်းစာဖတ်ခြင်းအားဖြင့် အခြားသောအမျိုးသမီးများကို ပြန်လည် သတင်းဖြန့်ဝေပေးနိုင်ကြောင်းကို “အခုတလော ပညာရေးနဲ့ပတ်သက်ပြီး အသက်(၆)နှစ်မှပဲ ကျောင်းလက်ခံတော့မယ်ဆိုတာတွေ ဘေးပတ်ဝန်းကျင်မှာ သတင်းထွက်နေတယ်၊ တကယ်တမ်း သေသေချာချာသိတာမဟုတ်ပဲ  ပွက်လောရိုက် နေတာကို စာစောင်တွေ ဖတ်ပြီးသိရတဲ့ (၆)နှစ်မှ လက်ခံတယ်ဆိုတာ ဟုတ်တယ်၊ ဒါပေမယ့် (၅)နှစ်ကလေးတွေကို မူကြို(KG)အဖြစ်ထားပြီး ကလေးတွေကို ပညာရေးမှာ တဆင့်ပြီးတဆင့် ပိုပြီးကောင်းမွန်စွာ တိုးတက်နိုင်ဖို့ ရည်ရွယ်နေတယ်ဆိုတာကို ပြန်ရှင်းပြနိုင်ခဲ့တယ်” လို့ပြောပါသည်။

ဆက်လက်ပြီးတော့လည်း “ ကိုယ်ရတဲ့အချိန်လေးမှာ သတင်းစာဖတ်ဖို့ အမျိုးသမီးထုကို ပြောချင်ပါတယ်၊ သူများကလေးတွေ ဂုဏ်ထူးဘယ်လောက်နဲ့ အောင် တယ်ဆိုတာမျိုး ဖတ်ရတဲ့အခါ ငါလည်း ငါ့ကလေးကို ဒီလိုဖြစ်အောင်လုပ်ပေးမယ်ဆိုပြီး ခွန်အားတွေလည်းရတယ်။ ဒါကြောင့် စာဖတ်မှပဲကလေးတွေကို ဘယ်လို ထိန်းကျောင်းသွားရင် ကောင်းမလဲဆိုတာတွေ သိမြင်လာနိုင်မယ်”လို့ပြောသည်။

“မြစ်ကြီးနားဂျာနယ်ကို ဖတ်ရတဲ့အတွက် အရမ်းဝမ်းသာအားရဖြစ်မိပါတယ်၊ ရှေ့ဆက် ပိုပိုပြီးတိကျတဲ့ သတင်း၊ မှန်ကန်တဲ့ သတင်းတွေကို မြစ်ကြီးနားဂျာနယ်မှ တင်ဆက်ဖော်ပြသွားပါ” “ ခဏတာပွင့်၊ ခဏတာလှ၊ ခဏတာမွှေးတဲ့ ပန်းလိုမဟုတ်ပဲ  မျိုးဆက်တခုပြီး နောက်တခုသို့ လက်ဆင့်ကမ်းပြီး တည်တံ့ခိုင်မြဲတဲ့ သတင်း တိုက်ကြီးဖြစ်ပါစေလို ဆန္ဒပြုလိုက်ပါတယ်”လို့ ပြောပါသည်။

ခေါန်နူး (စီမံကိန်းအရာရှိ၊ မီဒီယာ၊ ထွိုင် ကျားမတန်းတူရေးဖောင်ဒေးရှင်း)

ခေါ်န်နူးသည် လက်ရှိ Htoi Gender Foundation တွင် မီဒီယာနဲ့ပတ်သက်ပြီး စီမံကိန်းအရာရှိ (Project Officer) အဖြစ် တာဝန်ထမ်းဆောင်နေသည့် အမျိုး သမီးငယ်ဖြစ်သည်။

သူမအနေဖြင့် သတင်းစာစောင် ဖတ်လေ့ဖတ်ထရှိပေမယ့် ယခုအလုပ်နဲ့ပတ်သက်လာတော့ ပိုပြီးတစိုက်မတ်မတ် ဖတ်ရှုဖြစ်ကြောင်း“အလုပ်ကလည်း မီဒီယာနဲ့ ပတ်သက်ပြီးလုပ်ရတော့ ပိုအချိန်ပေးပြီး မြစ်ကြီးနားဂျာနယ်ကို ဖတ်ဖြစ်တယ်” ပြောပြခဲ့သည်။

စာဖတ်ခြင်းအားဖြင့် သူမအတွက် ဆောင်းပါးရေးသားနည်းတွေကို လေ့လာရရှိသလို သတင်းဖတ်ခြင်းအားဖြင့်လည်း ကချင်ပြည်နယ်အတွင်း ဖြစ်ပျက်နေသည့် အဖြစ်အပျက်တွေကို သိရကြောင်း၊ အလုပ်အတွက် သတင်းအချက်အလက်တွေလည်း ရရှိနိုင်သည်ဟုပြောပါသည်။

မြစ်ကြီးနားဂျာနယ်ထွက်ရှိလာခြင်းသည် အလွန်ကောင်းကြောင်းကို “ အခုလို ကချင်ပြည်နယ်က သတင်းတွေကို တင်ပြတဲ့ ပထမဆုံးထွက်တဲ့ သတင်းဂျာနယ် ဖြစ်တဲ့အတွက် အရမ်းကောင်းတယ်။ ကချင်ပြည်က လူမျိုးအားလုံးအတွက် အကျိုးရှိတယ်လို့မြင်တယ်”

မြစ်ကြီးနားဂျာနယ်တွင် တခါတရံသတင်းအချက်အလက်များ မှားနေတာတွေ ပြန်ပြီးပြောကြားလာသည့်အခါ ပြင်ဆင်ချက်ဖြင့် တောင်းပန်ပေးသင့်ကြောင်း၊ “လူ မှုကွန်ယက် (facebook) မှာ မြစ်ကြီးနားက ပြည်သူတွေကို ရန်တိုက်ပေးနေတယ်ဆိုတာတွေကို မဟုတ်မမှန်ကြောင်း ဖြေရှင်းသင့်တယ်၊ ဥပမာ – ကချင်ပြည်နယ်က သတင်းအစစ်အမှန်တွေကိုသာ ဖော်ပြပေးနေပါတယ် ဆိုတာမျိုးပေါ့” ဟု သူမ၏အမြင်ကိုအကြံပြုပြောဆိုပါသည်။

ဒေါ်လုရာ (သင်းထောက် ဆရာမ၊ အောင်မြင်သာရွှေ့ပြောင်းအိမ်ယာ)

အောင်မြင်သာရွှေ့ပြောင်းအိမ်ယာမှ သင်းထောက်ဒေါ်လုရာသည် ၁၉၉၀ ကျော်ခုနှစ်ကတည်းက သတင်းစာကို အပတ်စဉ်ဖတ်လာသူတစ်ဦးဖြစ်သည်။ ထိုအ ချိန်တွင် သူမသည် ကြေးမုံသတင်းစာ၊ မြန်မာ့အလင်းသတင်းစာများကို စာတိုက်မှ မှာယူပြီး ဖတ်လေ့ရှိကြောင်း၊ ယခုနောက်ပိုင်းတွင်မူ 7 days သတင်းဂျာနယ်၊ Weekly eleven သတင်းစာနှင့် မြစ်ကြီးနားသတင်းစာများကို အစဉ်သဖြင့်ဖတ်ကြောင်း မြစ်ကြီးနားဂျာနယ်ကိုပြောပြခဲ့သည်။

“သတင်းစာကို အားတဲ့အချိန်တွေမှာ ဖတ်တယ်” သတင်းစာဖတ်ခြင်းအားဖြင့် သူမအနေဖြင့် ရရှိခံစားသည့် အကျိုးကျေးဇူးများကို “ ကိုယ့်ပတ်ဝန်းကျင်၊ ဘေး ရွာတွေ ဘာတွေဖြစ်နေလဲဆိုတာတွေနဲ့ ကချင်ပြည်နယ်၊ မြန်မာနိုင်ငံတနိုင်ငံလုံး အတိုင်းအတာအထိ ဖြစ်ပျက်နေတဲ့ သတင်းအချက်အလက်တွေကို သိရှိနိုင်တယ်” လို့ ပြောပါသည်။

“သတင်းစာစောင်များမှာ ရာသီဥတုသတင်းများအပြင် နွေရာသီရောက်လာပြီဖြစ်တဲ့အတွက် ဘယ်လိုနေထိုင်၊ သွားလာ၊ စားသောက်သင့်ကြောင်း၊ ဘယ်ကုန် ဈေးနှုန်းတွေက တက်လာနိုင်တယ်ဆိုတာမျိုးတွေလည်းပါတော့ ဒီဟာတွေကို ဖတ်ရှုရပြီး ကိုယ်ကိုယ်တိုင်၊ မိသားစု၊ ပတ်ဝန်းကျင်နှင့် အိမ်ရှင်မတွေအကြားမှာ ပြန်ပြီး ပြောပြနိုင်တယ်”။

သင်းထောက်ဒေါ်လုရာသည် အမျိုးသမီးငယ်များစာစောင်များ၊ စာပေများများဖတ်ရန် တိုက်တွန်းလိုကြောင်း၊ သူမအနေဖြင့်လည်း သတင်းစာများ မရောက်ရှိ သည့် ကျေးရွာများသို့ ထွက်ရှိပြီးသား သတင်းစာဟောင်းများကို ပေးပို့ပြီး စာများများဖတ်လာရန် သူမတတ်နိုင်သလောက် လုပ်ဆောင်နေကြောင်းကို ပြောပြသည်။

မြစ်ကြီးနားဂျာနယ်များ ထွက်ရှိပြီး တပတ်အကြာမှသာ အောင်မြင်သာသို့ ရောက်ရှိလာသည့်အတွက်ကြောင့် မြစ်ကြီးနားဂျာနယ်မှ အချိန်နှင့်တပြေးညီ ထွက်ရှိ သည့် နောက်နေ့မနက်တွင် သတင်းစာစောင်များ ရောက်အောင် ဖြန့်စေလိုကြောင်းအကြံပြုခဲ့သည်။

ဆက်လက်ပြီးသင်းထောက်က“ အခုချိန်မှာ ပိုပြီး မြစ်ဆုံံရေကာတာ စီမံကိန်းနှင့် ပတ်သက်တဲ့ သတင်းအချက်အလက်တွေကို ရယူစေချင်တယ်၊ ပြီးတော့ လွန်ခဲ့တဲ့အချိန် သတင်းအင်တာဗျူးတွေမှာ ကျမတို့ အရမ်းပြောချင်တဲ့ စကားလုံးတွေကို တည်းဖြတ်ထားလိုက်တာ၊ ဖြုတ်ထားတာတွေ တွေ့ရတယ်၊ အဲဒီလို မလုပ်ပဲနဲ့ ကျမတို့ပြောရင် ပြောတဲ့အတိုင်း မကြောက်မရွံ့ပဲ သတင်းမှာ ထည့်ပေးစေချင်တယ်”လို့ ပြောပါသည်။

“ရှေ့ဆက်မြစ်ကြီးဂျာနယ် ဒီထက်ပိုပိုပြီးလုပ်ဆောင်လာနိုင်ပါစေ၊ ဆက်လက်အားပေးသွားမယ်”