မီဒီယာထုတ်ပြန်ချက်- မြန်မာနိုင်ငံရှိ ဂျဲန်ဒါရေးရာ/ အမျိုးသမီးများ၊ ငြိမ်းချမ်းရေးနှင့် လုံခြုံရေးဆိုင်ရာ ဆွေးနွေးပွဲများမှ အမျိုးသမီးအခွင့်အရေးနှင့် LGBTQIA+ အရေးဆောင်ရွက်နေသည့် အဖွဲ့အစည်းများ၏ စုစည်းညီညွတ်သောအသံများ

ကာလရှည်ကြာပဋိပက္ခများနှင့်အကြမ်းဖက်မှုဒဏ်ခံနေရသော အမျိုးသမီးများ၊ ဂျဲန်ဒါခံယူမှု ကွဲပြားစုံလင်သူများနှင့် ခြားနားသန်စွမ်းသူများအပါအဝင် လူအဖွဲ့အစည်းတွင် မသိကျိုးကျွန် ပြုခံထားရများ၏အသံကို မြှင့်တင်ရန်နှင့် ၎င်းတို့၏ စစ်အာဏာရှင်ဆန့်ကျင့်ရေး၊ ဒီမိုကရေစီ ပြန်လည်ရရှိရေး၊ လူ့အခွင့်အရေးကာကွယ်စောင့်ရှောက်ရေး ဦးလည်မသုန် ကြိုးပမ်းမှုများကို မှတ်တမ်းတင်ရန်အလို့ငှာ အမျိုးသမီးနှင့် LGBTIQA+ အရေး ဆောင်ရွက် နေသည့် အဖွဲ့အစည်းပေါင်း ၄၀ မှ ကိုယ်စားလှယ် ၅၈ ဦး ပါဝင်သည့် ဆွေးနွေးပွဲများကို ချင်းမိုင်တွင် ကျင်းပခဲ့ပါသည်။

၂၀၂၅ ခုနှစ်၊ ဇန်နဝါရီလနှင့် ဖေဖော်ဝါရီလများတွင် ၃ ကြိမ်တိုင် ကျင်းပပြုလုပ်ခဲ့သည့် လူတွေ့ဆွေးနွေးပွဲများ၌ အဆိုပါအဖွဲ့အစည်းများမှ တက်ရောက်သူများသည် မြန်မာနိုင်ငံ၏ ဂျဲန်ဒါ၊ အမျိုးသမီး၊ ငြိမ်းချမ်းရေးနှင့် လုံခြုံရေးဆိုင်ရာ ကိစ္စရပ်များနှင့် စပ်လျဉ်းသည့် အတွေ့အကြုံများ၊ ထိုးထွင်းသိမြင်မှုများကို တက်တက်ကြွကြွ ဆွေးနွေးဖလှယ်ခဲ့ကြပါသည်။

ထိုဆွေးနွေးပွဲများမှ ပေါ်ထွက်လာသည့် ဆွေးနွေးအကြံပြုချက်များကို အခြေခံ၍ အောက်ပါ အချက်များကို အကြံပြုတိုက်တွန်းလိုက်ရပါသည်။

အမျိုးသားညီညွတ်ရေးအစိုးရနှင့်တကွ ဒေသန္တရအစိုးရများက

အုပ်ချုပ်ရေးမူဘောင်များနှင့် မူဝါဒများတွင် ဂျဲန်ဒါ၊ အမျိုးသမီး၊ ငြိမ်းချမ်းရေးနှင့် လုံခြုံရေး ဆိုင်ရာ မူများကို ထည့်သွင်းကျင့်သုံးရန်၊

စွမ်းဆောင်ရည်မြှင့်အစီအစဉ်များ ဆောင်ရွက်ပေးခြင်းဖြင့် သက်ဆိုင်ရာဝန်ထမ်းများ၏ ဂျဲန်ဒါ၊ အမျိုးသမီး၊ ငြိမ်းချမ်းရေးနှင့် လုံခြုံရေးဆိုင်ရာ သဘောတရားများကို ပိုမိုနားလည် လာစေပြီး အကောင်အထည်ဖော်​ဆောင်မှု ကတိကဝတ်များ မြင့်မားလာစေရန်၊

ပဋိပက္ခနှင့်ဆက်နွယ်သော လိင်ပိုင်းဆိုင်ရာအကြမ်းဖက်မှုနှင့် ဂျဲန်ဒါအခြေပြုအကြမ်းဖက်မှုမှ လွတ်မြောက်လာသူများအတွက် ဝန်ဆောင်မှုများအကောင်အထည်ဖော်ခြင်း၊ သတင်းအချက် အလက်မျှဝေခြင်းနှင့် သိမြင်နားလည်မှုများဖလှယ်ခြင်းတို့ ဌာနအချင်းချင်းကြား ပုံမှန် ဆောင်ရွက်ရန်၊

အရေးပေါ်အထောက်အပံ့များ၊ ပြန်လည်ကုစားရေးအစီအစဉ်များတွင် ဂျဲန်ဒါအမြင် ထည့်သွင်းစဉ်းစားမှုရှိပြီး ရေရှည်တည်တံ့ရန်၊

သက်မွေးဝမ်းကျောင်းဆိုင်ရာ ပြန်လည်ကုစားရေးမဟာဗျူဟာများ အပါအဝင် ပဋိပက္ခ သက်ရောက်ခံစားရသူများ၏ ပြန်လည်ထူထောင်နိုင်စွမ်းနှင့် ကိုယ်ထူကိုယ်ထဖူလုံရေးတို့ကို မြှင့်တင်ပေးမည့် အစီအမံများ ပြဌာန်းပေးရန်၊

ဂျဲန်ဒါ၊ အမျိုးသမီး၊ ငြိမ်းချမ်းရေးနှင့် လုံခြုံရေးကိစ္စရပ်များနှင့်စပ်လျဉ်းပြီး ပြည်သူ့အသိ ရေချိန်မြင့်မားရေးအတွက် အွန်လိုင်း၊ အော့ဖ်လိုင်း မီဒီယာများကို ထိထိရောက်ရောက် အသုံးချရန်၊

ဂျဲန်ဒါ၊ အမျိုးသမီး၊ ငြိမ်းချမ်းရေးနှင့် လုံခြုံရေးအစီအစဉ်များ မြှင့်တင်ရေးအတွက် အချက် အလက်သာဓကများပေါ် အခြေခံသည့် မူဝါဒများ၊ အစီအစဉ်များရေးဆွဲရန် ပညာရှင်များ၊ ပညာရေးအဖွဲ့အစည်းများနှင့် ပူးပေါင်းပြီး လုပ်ဆောင်ချက်များကို ဦးတည်သည့် သုတေသနများ ဆောင်ရွက်ရန်၊

ဂျဲန်ဒါအခြေပြုအကြမ်းဖက်မှုနှင့် ပဋိပက္ခနှင့်ဆက်နွယ်သော လိင်ပိုင်းဆိုင်ရာအကြမ်းဖက်မှု ဖြစ်စဉ်များကို မှတ်တမ်းတင်ရန်၊ သက်သေအထောက်အထားများကို ထိန်းသိမ်းထားရန်နှင့် တာဝန်ခံမှုရှိစေရေး၊ အသွင်ကူးပြောင်းရေးကာလ တရားမျှတမှုဆောင်ကြဉ်းနိုင်ရေးအတွက်  တိုင်ကြားရေးယန္တရားတစ်ခု ဖန်တီးရန် ပူးတွဲစောင့်ကြည့်၊ ဆန်းစစ်၊ ဆင်ခြင်၊ သင်ယူသည့် လုပ်ငန်းစဉ်များကို ပူးပေါင်းလုပ်ဆောင်ရန် ကျွန်ုပ်တို့ တိုက်တွန်းသည်။

လူ့အခွင့်အရေးဝန်ကြီးဌာန၊ လူသားချင်းစာနာထောက်ထားရေးနှင့် ဘေးအန္တရာယ်ဆိုင်ရာ စီမံ ခန့်ခွဲရေးဝန်ကြီးဌာန၊ အမျိုးသမီး၊ လူငယ်နှင့် ကလေးသူငယ်ရေးရာဝန်ကြီးဌာန၊ ပြည်ထဲ ရေးနှင့် လူဝင်မှုကြီးကြပ်ရေးဝန်ကြီးဌာန၊ တရားရေးဝန်ကြီးဌာနနှင့်၊ ကာကွယ်ရေးဝန်ကြီး ဌာနတို့က

ဂျဲန်ဒါအခြေပြုအကြမ်းဖက်မှုနှင့် ပဋိပက္ခနှင့်ဆက်နွယ်သော လိင်ပိုင်းဆိုင်ရာအကြမ်းဖက်မှု များကို တုံ့ပြန်ဆောင်ရွက်သည့် ယန္တရားများ၊ တားဆီးကာကွယ်ရေးအစီအမံများနှင့် ကျူးလွန်သူများက တာဝန်ခံစေရေး အစီအမံများကို မဟာဗျူဟာမြောက် ဆောင်ရွက်နိုင်ရန် အလို့ငှာ ဒေသခံအဖွဲ့အစည်းများ၊ အမျိုးသမီးများအခွင့်အရေး ဆောင်ရွက်နေသည့် အဖွဲ့ အစည်းများ၊ ဝန်ဆောင်မှုပေးနေသူများနှင့် ပုံမှန်ပူးပေါင်းဆောင်ရွက်ကြရန်၊

အမျိုးသမီးများအား လိင်ပိုင်းဆိုင်ရာထိပါးနှောက်ယှက်မှု၊ ခေါင်းပုံဖြတ်အမြတ်ထုတ်မှု၊ အကြမ်းဖက်မှုတို့မှ အကာအကွယ်ပေးရေးမူဝါဒအား အကောင်အထည်ဖော်မှု သေချာ ထိရောက်စေရေး ပူးပေါင်းဆောင်ရွက်ကြရန် တိုက်တွန်းလိုက်သည်။

တိုင်းရင်းသားတော်လှန်ရေးအဖွဲ့အစည်းများက

ဂျဲန်ဒါအခြေပြုအကြမ်းဖက်မှုနှင့် ပဋိပက္ခနှင့်ဆက်နွယ်သော လိင်ပိုင်းဆိုင်ရာအကြမ်းဖက်မှု များကို ထိထိရောက်ရောက်တုံ့ပြန်ရေးနှင့် ပြစ်ဒဏ်ကင်းလွတ်ခွင့်ရနေသည့် အလေ့အထ ပပျောက်ရေးအတွက် ဒေသခံအဖွဲ့အစည်းများ၊ အမျိုးသမီးများအခွင့်အရေး ဆောင်ရွက်နေ သည့် အဖွဲ့အစည်းများ၊ ဝန်ဆောင်မှုပေးနေသူများနှင့် ပုံမှန်ညှိနှိုင်းဆောင်ရွက်ကြရန်၊

လူသားချင်းစာနာထောက်ထားမှုနှင့် အရေးပေါ်တုံ့ပြန်ဆောင်ရွက်မှုများ အပါအဝင် ဆောင် ရွက်ချက်အားလုံးတွင် ဂျဲန်ဒါတန်းတူညီမျှရေးမူများကို ထည့်သွင်းဆောင်ရွက်ကြရန်၊

ဆုံးဖြတ်ချက် ချမှတ်သည့် အဆင့်တိုင်းတွင် အမျိုးသမီးများ အဓိပ္ပါယ်ရှိစွာပါဝင်မှု မြင့်မား လာစေရန် ပြည့်စုံပြီး လက်တွေ့ကျသည့် အစီအမံများ ကျင့်သုံးကြရန်၊

အမျိုးသမီး၊ မိန်းကလေးနှင့် လျစ်လျူရှုခံထားရသူများအား အကာအကွယ်ပေးသည့် ထိရောက်သော ယန္တရားများ၊ လုပ်ထုံးလုပ်နည်းများ (ဥပမာ − လိင်ပိုင်းဆိုင်ရာ ထိပါးနှောက်ယှက်မှု၊ ခေါင်းပုံဖြတ်အမြတ်ထုတ်မှု၊ အကြမ်းဖက်မှုမှ အကာအကွယ်ပေးရေး မူဝါဒ) ချမှတ်ကြရန်တိုက်တွန်းလိုက်သည်။

နိုင်ငံတကာ သက်ဆိုင်သူများ၊ ရံပုံငွေထောက်ပံ့သူများ၊ အလှူရှင်များက

အခြေခံလူထု၏ ဒေသပြန်လည်ထူထောင်အရေး ကြိုးပမ်းအားထုတ်မှုများ တည်တံ့စေရေး အတွက် အမျိုးသမီးရေးစုပေါင်းရံပုံငွေ၊  နယ်စပ်ဖြတ်ကျော်ရံပုံငွေအပါအဝင် လူထုဦးဆောင် ထည့်ဝင်သည့် ရံပုံငွေယန္တရားများ ထူထောင်ရေးတွင် ထောက်ပံ့ကြရန်၊

ဂျဲန်ဒါအမြင်ထင်ဟပ်သည့် ကူညီထောက်ပံ့ရေးနှင့် ပြန်လည်ကုစားရေးအစီအစဉ်များကို အမျိုးသားညီညွတ်ရေးအစိုးရ၊ တိုင်းရင်းသားတော်လှန်ရေးအဖွဲ့အစည်းများ၊ ပြည်တွင်း အဖွဲ့အစည်းများနှင့် အမျိုးသမီးများ အခွင့်အရေးကို ဆောင်ရွက်နေသည့် အဖွဲ့အစည်းများ နှင့် ပူးပေါင်းဆောင်ရွက်ကြရန်၊

အမျိုးသမီးများအခွင့်အရေး ကာကွယ်စောင့်ရှောက်သူများ၊ အကြမ်းဖက်ခံရမှုမှ လွတ် မြောက်လာသူများအတွက်  လုံခြုံရာနေရာများ၊ အကာအကွယ်ပေးရေးစနစ်များနှင့် အစီအမံ များ ဖန်တီးပေးကြရန်၊

ဂျဲန်ဒါအခြေပြုအကြမ်းဖက်မှုနှင့် ပဋိပက္ခနှင့်ဆက်နွယ်သော လိင်ပိုင်းဆိုင်ရာအကြမ်းဖက်မှု ဖြစ်စဉ်များကို တုံ့ပြန်ဆောင်ရွက်ရာတွင် ကျူးလွန်ခံရမှုမှ လွတ်မြောက်လာသူကို ဗဟိုပြု ချဉ်းကပ်သည့် အစီအမံများ ဖြစ်စေရန် တိုက်တွန်းလိုက်သည်။

အာဆီယံအဖွဲ့အစည်းများနှင့် အဖွဲ့ဝင်နိုင်ငံများက

ဒေသခံပြည်သူများ၊ အထူးသဖြင့် အမျိုးသမီးများနှင့် လျစ်လျူရှုခံရသူတို့၏ အသံများကို နားထောင်ပြီး ပဋိပက္ခနှင့် အကြမ်းဖက်ခံရသူများအတွက် ခိုင်မာအားကောင်းသည့် ထောက်ပံ့ ရေးအစီအစဉ်များ ဆောင်ရွက်ကြရန်၊

ပြည်တွင်းလိုအပ်ချက်များ၊ စိုးရိန်ပူပန်မှုများနှင့် ကိုက်ညီသည့် ဆောင်ရွက်ချက်များ ဖြစ်စေရန်အလို့ငှာ ဒေသခံအဖွဲ့အစည်းများ၊ အမျိုးသမီးများအခွင့်အရေး ဆောင်ရွက်နေ သည့် အဖွဲ့အစည်းများနှင့် ပူးပေါင်းဆောင်ရွက်ကြရန်၊

ကုလသမဂ္ဂလုံခြုံရေးကောင်စီ ဆုံးဖြတ်ချက်အမှတ် ၂၆၆၉/၂၀၂၂ အား ထိရောက်စွာ အကောင်အထည်ဖော်ရေးအား သေချာစေရန်တိုက်တွန်းလိုက်သည်။

ဆက်သွယ်ရန် −

(1) AIT (GenderLab): [email protected]

(2) colleXive (cXv): [email protected]

(3)M-WPS:  [email protected]

4) Itthiya Foundation [email protected]

(5) Gender Equality Network: [email protected]