အမျိုးသမီးအပေါ် အကြမ်းဖက်လိုက်တဲ့သူကလည်း ဒီလိုလုပ်ခြင်းကြောင့် "ငါနိုင်လိုက်ပြီ” ဆိုတဲ့ အတွေး စိတ်ထားမျိုးနဲ့ ကျူးလွန်တတ်ပါတယ်။ ကိုယ်မနှစ်သက်တဲ့ ဘက်တဖက်က အမျိုးသမီးတွေေပေါ် အခုလိုလုပ်လိုက်ခြင်းအားဖြင့် တဖက်က လူအုပ်စုအပေါ် အနိုင်ရလိုက်တယ်လို့ ခံစားတတ်တဲ့ စိတ်ထားမျိုးတွေ ရှိတတ်ပါတယ်။

ကျွန်မတို့ မြန်မာ့လူ့ဘောင်မှာ ဘာကြောင့် .. ဘယ်လို .. ဆိုတဲ့ အရင်းအမြစ် သက်သေ သေသေချာချာ မရှိဘဲ လက်သင့်ခံထားတဲ့ .. ‘ယောက်ျား တွေက မိန်းမ တွေထက် မြတ်တယ်’ ဆိုတဲ့ အယူအဆမျိုးကြောင့် အမျိုးသမီးတွေအတွက် အရေးပါတဲ့ ဆုံးရှုံးမှုတွေ ရှိနေတာ ကျွန်မတို့ သတိပြုမိကြ ပါရဲ့လား။

ဒီလိုသာ အဓမ္မအနိုင်ကျင့်ဆက်ဆံတာကို သားမယားပြုကျင့်တယ်လို့ ဆိုလိုက်မယ်ဆိုရင် ဒါဟာ ကိုယ့်အမေ အပါအဝင် အမျိုးသမီးတွေ ရဲ့အဆင့်ကို နှိမ့်ချ စော်ကားလိုက်တာနဲ့ အတူတူပဲ ဖြစ်ပါတယ်။ အဲဒီနောက်ဆက်တွဲမှာတော့ လင်ယောကျ်ားက ဆက်ဆံတာ နဲ့ မုဒိမ်းကောင်က ပြုကျင့်တဲ့ အဓမ္မမှုဟာ အတူတူပဲလို့ အဓိပ္ပါယ် ပေါက်သွားပါတယ်။