လေကြောင်းနဲ့မြေပြင်တိုက်ခိုက်မှုတွေကြောင့် ၁လအတွင်း အမျိုးသမီး ၅၅ဦးသေဆုံး – ရခိုင်ပြည်နဲ့ စစ်ကိုင်းတိုင်းက အများဆုံးပါဝင်

‌

ဒေဝီ

ယခုနှစ် သြဂုတ်လအတွင်း စစ်အုပ်စုက လေကြောင်းနဲ့မြေပြင် တိုက်ခိုက်မှုတွေကြောင့် မြန်မာနိုင်ငံ တဝှမ်း အမျိုးသမီး ၅၅ ဦး အသက် ဆုံးရှုံးခဲ့ရပြီး ထိခိုက်ဒဏ်ရာရသူ ၅၂ ဦးရှိခဲ့တယ်လို့ မြန်မာ့အမျိုးသမီးသမဂ္ဂ(BWU) က ယနေ့ စက်တင်ဘာ ၄ရက်မှာ ထုတ်ပြန်ပါတယ်။

ယခုနှစ် သြဂုတ် ၁ရက်ကနေ ၃၁ရက် အတွင်း BWU က သတင်း မီဒီယာတွေထဲ အချက်အလက် စောင့်ကြည့်လေ့လာ မှတ်တမ်းတင်မှုအရ သေဆုံးသူတွေအားလုံးက လေကြောင်းတိုက်ခိုက်မှူ တခုတည်းနဲ့သေဆုံးခဲ့တာဖြစ်ပြီး ဒီအထဲ အသက် ၁၈နှစ်အောက် အမျိုးသမီး ၆ဦးပါဝင်နေတယ်လို့ ဖော်ပြထားပါတယ်။

ဒါ့အပြင်လေကြောင်းတိုက်ခိုက်မှုကြောင့် ထိခိုက်ဒဏ်ရာ ရရှိခဲ့သူ အမျိုးသမီး ၄၃ဦး ၊လက်နက်ကြီး ပစ်ခတ်မှုကြောင့် ၃ ကျည်ထိမှန်မှုကြောင့် ၃ဦး၊ မြေမြုပ်မိုင်းကြောင့် ၃ ဦးရှိခဲ့ပါတယ်။

အသက်ဆုံးရှုံးခဲ့ရတဲ့ အမျိုးသမီးဦးရေ ၅၀ကျော်အနက် ရခိုင်ပြည်နယ်က အများဆုံးဖြစ်ပြီး စစ်ကိုင်းတိုင်းဒေသကြီး၊ ချင်းပြည်နယ်၊ မကွေးတိုင်းဒေသကြီးနဲ့ ပဲခူးတိုင်းက အမျိုးသမီးတွေ ပါဝင်ပါတယ်။

စစ်အုပ်စုဟာ အစိုးရတရပ်လို ပုံဖော်နေပေမယ့် လက်တွေ့မှာ နိုင်ငံတဝှမ်းလေကြောင်းတိုက်ခိုက်ခြင်း ၊ ပြည်သူတွေကို အစုလိုက်အပြုံလိုက် သတ်ဖြတ်တာ၊ ညှင်းပန်းနှိပ်စက်တာ အစရှိတဲ့ လုပ်ရပ်တွေကို စဥ်ဆက်မပြတ် တွင်တွင်ကျယ်ကျယ်လုပ်ဆောင်လျက်ရှိပြီး ဒီလိုအကြမ်းဖက်မှုတွေ အဆုံးသတ်နိုင်ရန် အားကောင်းပြီး တိကျသေချာတဲ့ အကူအညီနဲ့ လက်တွေ့လုပ်ဆောင်မှုတွေကို အရေးတကြီး လိုအပ်လျှက်ရှိတယ်လို့ BWU ကဆိုပါတယ်။

မြန်မာ့အမျိုးသမီးသမဂ္ဂ( BWU) ရဲ့ စာရင်းဇယားတွေအရ ၂၀၂၆ ခုနှစ်၊ ဇန်နဝါရီလ မှ ဇူလိုင်လ အထိ လေကြောင်းနဲ့မြေပြင် တိုက်ခိုက်မှုတွေကြောင့် မြန်မာနိုင်ငံတဝှမ်း အမျိုးသမီး ၃၅၈ဦး အသက် ဆုံးရှုံး ခဲ့ရပြီး ထိခိုက်ဒဏ်ရာရသူ ၃၅၁ဦးရှိခဲ့တယ်လို့ သိရပါတယ်။