ငလျင်ကယ်ဆယ်ရေးမှာ တစ်တပ်တစ်အားပါဝင်ခဲ့တဲ့ အသက် ၁၂ နှစ်အရွယ် နန်းဒေဝီ
ကေခိုင်
ပြိုပျက်ပျံ့ကြဲနေတဲ့ အဆောက်အဦးအပျက်အစီးတွေကြားမှာ ငလျင်ကယ်ဆယ်ရေးအတွက် ကူညီဆောင်ရွက်နေတဲ့ အိန္ဒိယနိုင်ငံသားကယ်ဆယ်ရေးအဖွဲ့ကို ကူညီဘာသာပြန်ပေးနေတဲ့ မိန်းကလေးငယ်လေးရဲ့မြင်ကွင်းက လူမှုကွန်ယက်မှာပျံ့နှံ့လာပြီး အဆိုပါမိန်းကလေးငယ်ကို ချီးကျုးဂုဏ်ပြုမှုတွေရှိခဲ့ပါတယ်။
အသက်ငယ်ရွယ်သေးတဲ့ မိန်းကလေးငယ်လေးတစ်ဦးက ကူညီကယ်ဆယ်ရေးလုပ်ဆောင်နေတဲ့ နိုင်ငံခြားသားအဖွဲ့တွေနဲ့ အပျက်အစီးပုံရှင်းလင်းပေးတဲ့ လုပ်သားတွေကိုကြားခံဘာသာပြန်ပြောဆိုပေးမှုကို အများအပြားနှစ်ခြိုက်ခဲ့ကြပါတယ်။
အဲဒီမိန်းကလေးကတော့ အသက် ၁၂နှစ်အရွယ်သာရှိသေးတဲ့ မနန်းဒေဝီပဲဖြစ်ပါတယ်။
နန်းဒေဝီက ငလျင်ကြောင့် လူဦးရေများစွာထိခိုက်သေဆုံးပြီး နေအိမ်တိုက်တာအများအပြား ထိခိုက်ပျက်စီးခဲ့ရတဲ့ မန္တလေး မြို့ကိုလာရောက်ကူညီကယ်ဆယ်ရေးလုပ်ဆောင်နေတဲ့ အိန္ဒိယနိုင်ငံကကယ်ဆယ်ရေးအဖွဲ့ကို စကားပြန်အနေနဲ့ ကူညီလုပ်ဆောင်ပေးခဲ့တာပါ။
အင်အားပြင်းငလျင်ဒဏ်အကြီးအကျယ်ခံခဲ့ရတဲ့ မန္တလေးမြို့မှာ လူသေဆုံးမှုများပြားခဲ့သလို နေအိမ်တိုက်တာတွေလည်းပြို ကျပျက်စီးခဲ့ရတယ်။ ဒီလိုအပြိုအပျက်တွေထဲ လူထောင်ချီ၊ သောင်းချီပိတ်မိခဲ့တဲ့အတွက် ပြည်တွင်းကတင်မက နိုင်ငံတကာ ကူညီကယ်ဆယ်ရေးအဖွဲ့အစည်းတွေပါ လာရောက်ကူညီကယ်ဆယ်မှုတွေပြုလုပ်ခဲ့ရပါတယ်။
နန်းဒေဝီရဲ့ အဘိုးဖြစ်သူကဆောက်လုပ်ရေးလုပ်ငန်းသုံးဘတ်ဟိုးကားငှားသူဖြစ်တဲ့အတွက် တိုက်အပြိုအပျက်တွေကို သွား ရောက်ရှင်းလင်းရာမှာပါဝင်ခဲ့ပါတယ်။ သူလည်း အဖိုးဖြစ်သူနဲ့အတူလိုက်ပါဖို့ ခွင့်တောင်းပြီး အပျက်အစီးတွေရှိရာကိုလိုက် ပါကြည့်ရှု့ခဲ့ပါတယ်။
နေရာက လမ်း၉၀၊ ၄၁ နဲ့ ၄၂ လမ်းကြားက နေအိမ်တစ်ခုပါ။ အောက်ထပ်မှာ စက်ပစ္စည်းအရောင်းဆိုင်ဖွင့်လှစ်ပြီး အပေါ် ထပ်မှာလူနေထိုင်တဲ့ တိုက်ကငလျင်ဒဏ်ကြောင့် ပြိုကျခဲ့ရပါတယ်။ အဲ့ဒီတိုက်ကိုရှင်းလင်းဖို့ ရှာဖွေကယ်ဆယ်ရေးလုပ် ဆောင်နေတဲ့အိန္ဒိယအဖွဲ့တွေနဲ့ ကူညီရှင်းလင်းရေးလုပ်သားတွေကြား စကားပြောဆိုရာမှာ ဘာသာစကားအခက်အခဲဖြစ်နေ တဲ့အတွက် အဘိုးဖြစ်သူရဲ့ တိုက်တွန်းချက်နဲ့ ကူညီပေးဖြစ်ခဲ့တာလို့ဆိုပါတယ်။
“ဖိုးဖိုးကူညီပေးတဲ့နေရာကို လိုက်ကြည့်ရင်း အိန္ဒိယအဖွဲ့တွေနဲ့ မြန်မာကလူတွေ စကားပြောတာ အခက်တွေ့နေကြတော့ ပြောပေးလိုက်ပါလားဆိုပြီးအဖိုးကပြောလို့ ဝင်ကူညီရင်းလုပ်ဖြစ်ခဲ့တာ”လို့ နန်းဒေဝီကပြောပါတယ်။
အိန္ဒိယအဖွဲ့ကို အင်္ဂလိပ်ဘာသာစကားနဲ့ ဘာသာပြန်ပြောဆိုပေးခဲ့တာဖြစ်ပြီး သူ့အနေနဲ့ကတော့ အခက်အခဲမရှိခဲ့ဘူးလို့ ဆိုပါ တယ်။
“အများကြီးမရှိခဲ့ပါဘူး။ အိန္ဒိယအဖွဲ့တွေက ဖြိုဖို့ပြောချိန်မှာဘတ်ဟိုးသမား ဖြိုခိုင်းတဲ့ အချိန်မှာ မဖြိုချင်ဘူး၊ ကြောက်တယ်၊ အဲဒီအချိန်မှာ နှစ်ဖက်လုံးနဲ့ပြန်ညှိပေးခဲ့ရတယ်။ အဆင်ပြေအောင်တော့ ညှိနှိုင်းပေးခဲ့တယ်”လို့ သူကဆိုပါတယ်။
အိန္ဒိယအဖွဲ့တွေနဲ့ ဘာသာပြန်မှုကို မတ်လ ၃၁ ရက်နဲ့ ဧပြီ ၁ရက်နေ့ လုပ်ဆောင်ပေးခဲ့ပြီး အဲဒီမှာ နေအိမ်အပျက်အစီးတွေ ကြားကနေ သေဆုံးသူတစ်ဦးတွေ့ရှိခဲ့ပါတယ်။
အိန္ဒိယနိုင်ငံသားကူညီကယ်ဆယ်ရေးအဖွဲ့ဝင်တွေအတွက် ဘာသာပြန်ကူညီမှုကို ကြုံကြိုက်တဲ့အချိန်မှာ မေတ္တာနဲ့ကူညီခဲ့ တာ ဖြစ်ပြီး နောက်ရက်တွေမှာတော့ အိန္ဒိယအဖွဲ့က ထိခိုက်မှုကြီးမားတဲ့နေရာတွေကိုသွားရောက်လုပ်ဆောင်ကြတဲ့ အတွက် မလိုက်ဖြစ်ခဲ့ဘဲ အလှုရှင်အချို့နဲ့အတူလိုအပ်သူတွေအတွက် လှုဒါန်းမှုတွေမှာသာပါဝင်ဖြစ်ခဲ့တယ်လို့ သူကဆက်ပြောပါ တယ်။
မတ်လ ၂၈ ရက် မွန်းလွဲပိုင်းက စစ်ကိုင်းတိုင်းကို ဗဟိုပြုလှုပ်ခတ်ခဲ့တဲ့ ငလျင်က ရစ်ချက်တာ စကေး ၇.၇ ပြင်းအားရှိပြီး စစ် ကိုင်းတိုင်း၊ မန္တလေးတိုင်း၊ နေပြည်တော်နဲ့ ရှမ်းပြည်နယ်တောင်ပိုင်းဒေသတွေမှာ ထိခိုက်ပျက်စီးမှုများပြားခဲ့ပြီး ဧပြီလ ၈ ရက် နေ့အထိ သေဆုံးသူ ၃၆၄၅ ဦး၊ ဒဏ်ရာရရှိသူ ၅၀၁၇ဦးနဲ့ ပျောက်ဆုံးသူ ၁၄၈ ဦးတို့ရှိနေတယ်လို့ စစ်ကောင်စီကထုတ်ပြန် ထားပါတယ်။
လက်ရှိအချိန်ထိလည်း ပြိုကျပျက်စီးနေတဲ့အဆောက်အဦးတွေကြား ပိတ်မိနေတဲ့ရုပ်အလောင်းတွေကို ကယ်ဆယ် ထုတ် ယူပြီး အဆောက်အဦးအပြိုအပျက်တွေကို ရှင်းလင်းနေရဆဲဖြစ်ပါတယ်။
ပြင်ဆင်ချိန်မရဘဲ ရုတ်တရက်ကြုံတွေ့ခဲ့ရတဲ့ ငလျင်ကြောင့် လူအများအပြားထိခိုက်မှုကို မျက်မြင်တွေ့မြင်ရတဲ့အတွက် ဝမ်းနည်းမိသလို၊ ဆိုးရွားတဲ့ငလျင်မှာ နေရာပေါင်းစုံ၊ ဘက်ပေါင်းစုံကအကူအညီတွေအများကြီးလိုနေတာမြင်ပြီး တတ်နိုင် တဲ့နေရာတွေမှာ ပါဝင်ဖြစ်နေတယ်လို့ နန်းဒေဝီကဆိုပါတယ်။
“ကပ်ဘေးကြီး ကြုံတွေရတဲ့သူတွေအတွက် တကယ့်ကို စိတ်မကောင်းပါဘူး။ ဖြစ်သွားတာက ချက်ချင်းကြီးဆိုတော့ ဘယ် သူမှပြင်ဆင်ချိန် မရသလိုပြင်ဆင်ဖို့လည်း ဘယ်သူမှမတွေးထားဘူး။ အဲဒီအတွက်လည်းဝမ်းနည်းတယ်” လို့သူကဆက် ပြောပါတယ်။
သူဘာသာပြန်ပေးနေတဲ့အချိန် အဖိုးဖြစ်သူက အမှတ်တရရိုက်ပေးထားပြီး လူမှုကွန်ယက်ပေါ်တင်တဲ့အခါ ငလျင်အကြီး အကျယ်လှုပ်ခတ်ပြီးလူသေဆုံး၊ ပျောက်ဆုံးမှုများချိန် ဒီလိုတင်တာကို လူပြောမှာစိုးရိမ်ပေမယ့် အားလုံးက ဝိုင်းဝန်းချီးကျူး ကြတဲ့အတွက် ဝမ်းသာပီတိဖြစ်ရတယ်လို့ သူကဆက်ပြောပါတယ်။
ကြည့်ရှု့သူအများစုက အသက်ငယ်ငယ်မိန်းကလေးကအပျက်အစီးပုံတွေကြား ယုံကြည်ချက်ချက်ရှိရှိနဲ့ ဘာသာပြန်နေတဲ့ အပေါ် ချီးကျူးကြပြီး ဒီအတွက် ပညာရေးပိုင်းရော၊ စိတ်ခွန်အားရော ပံ့ပိုးပေးခဲ့တဲ့ မိဘတွေကို ကျေးဇူးတင်မိသလို ငယ်စဉ် ကတည်းက အရာရာကို ကြောက်ရွံစိတ်မရှိဘဲ နေထိုင်တက်အောင် လမ်းညွှန်သင်ကြားပေးမှုကြောင့် ဒီလိုလုပ်ဆောင်နိုင်ခဲ့ တာလို နန်းဒေဝီကဆိုပါတယ်။
သူ့ရဲ့မိခင်ဖြစ်သူကလည်း သမီးဖြစ်သူကိုလူအများချီးကျူးမှုအတွက် ဂုဏ်ယူမိပြီး၊ ငယ်စဉ်ကတည်းကပညာရေးလမ်း ကြောင်းကောင်းမွန်ဖို့ ပံ့ပိုးပေးခဲ့သလို ကလေးတွေကို ငယ်စဉ်ကတည်းက သတ္တိရှိအောင်၊ အရွယ်နဲ့ အလိုက်လုပ်ကိုင်ရမယ့် အရာတွေ၊ ကူညီတတ်ဖို့ကို သင်ကြားပေးထားတာလို့ ဆိုပါတယ်။
“သူတို့ ကိုယ်ပိုင် Mindset(စိတ်) ကိုက မကြောက်တက်ဘူးပေါ့နော်၊ ဘယ်ဟာနေနေ လုပ်ပေးချင်စိတ် ကိုင်ပေးချင် စိတ်ရှိ တယ်။ မကြောက်တက်အောင် ဒီတိုင်းပဲ အမြဲသင်ပေးခဲ့တာ၊ ဒီလိုလူတွေချီးကျုးတဲ့အတွက် မိခင်တစ်ဦးအနေနဲ့တော့ ပီတိ ဖြစ်ရတယ်” လို့ မိခင်ဖြစ်သူကပြောပါတယ်။
မိဘတွေအနေနဲ့လည်း ကျောင်းပညာရေးကို ငယ်စဉ်ကတည်းကပံ့ပိုးပေးခဲ့ပြီး၊ မူလတန်းကို ILBC နဲ့ MLA International School တို့မှာ Grade 5 ထိသင်ကြားခဲ့ပြီးနောက် မန္တလေးမြို့က Dream Land International School မှာ Grade 6 အထိ ပညာသင်ကြားခဲ့ပါတယ်။
နန်းဒေဝီက လူမှုကွန်ယက်တခုဖြစ်တဲ့ Tit Tok မှာလည်း လူသိများထင်ရှားသူတစ်ဦးဖြစ်ပြီး စီးပွားရေးကြော်ငြာလေးတွေ ရိုက်ကူးတာဝါသနာပါသလို ပညာရေးဘက်မှာလည်း သိပ္ပံဘာသာနဲ့ ပတ်သတ်တာတွေကို စိတ်ဝင်စားသူဖြစ်တယ်လို့ မိခင် ဖြစ်သူကပြောခဲ့ပါတယ်။
လူမှုကူညီရေးလုပ်ဆောင်ရတာစိတ်အားထက်သန်တဲ့ နန်းဒေဝီက ငလျင်ဘေးကြုံတွေ့ရတဲ့အချိန်မှာ လိုအပ်တဲ့နေရာကနေ ပါဝင်လုပ်ဆောင်ခွင့်ရတဲ့အတွက် ကျေနပ်မိသလို၊ ရှေ့ဆက်ပြီးလည်း ကိုယ်တက်နိုင်တဲ့နေရာကနေ အများအတွက် အကျိုး ရှိမယ့်အရာတွေကို လုပ်ဆောင်ချင်တယ်လို့ သူကဆိုပါတယ်။
“ဆိုးရွားတဲ့ငလျင်ဒဏ်ကို ကြုံတွေ့ခဲ့ရတဲ့ပြည်သူတွေကိုလည်း အားတင်းထားဖို့ပြောချင်ပြီး ငလျင်ကယ်ဆယ်ရေးမှာ တစ်တပ်တစ်အားပါဝင်ကူညီနေတဲ့ Volunteer (စေတနာ့ဝန်ထမ်း)တွေလည်း ဘေးကင်းလုံခြုံဖို့လိုသလို၊ မြန်မာနိုင်ငံကို ဆက်လက်ကူညီ ကြဖို့လည်း အားလုံးကိုမေတ္တာရပ်ခံချင်တယ်”လို့ နန်းဒေဝီကပြောပါတယ်။
