ကိုယ်ဝန်ဆောင်ဖို့ ကြောက်လာကြတဲ့ ရခိုင်က စစ်ရှောင် အမျိုးသမီးတွေ
🔳 ရိုက်ကူး/ တည်းဖြတ် – ညီထွေး
လေကြောင်းတိုက်မှုတွေအပါအဝင် စစ်ရေးပဋိပက္ခဒဏ်ကို ပြင်းပြင်းထန်ထန်ခံနေကြတဲ့ ရခိုင်ရှိ စစ်ဘေးရှောင်အမျိုးသမီးတွေဟာ ကိုယ်ဝန်ဆောင် ကလေးမွေးဖို့ ကြောက်နေကြတယ်လို့ ဆိုပါတယ်။
“အခုဆိုရင် ကာကွယ်ဆေးလည်း မထိုးရဘူး။ ဒီမှာဆိုရင် ကလေးတွေ လမစေ့ဘဲ မွေးတာတွေရှိတယ်။ လမစေ့ဘဲ မွေးဖွားလို့ ကလေးတွေ သေသွားကြတာလည်း ရှိပါတယ်။ မွေးပြီးလို့ တစ်လ နှစ်လဆိုတာနဲ့ ကလေးတွေ သေသွားကြတာလည်းရှိပါတယ်။ မိခင်က အဟာရချို့တဲ့ လို့ ကလေးတွေ ဆုံးရှုံးသွားတာရှိပါတယ်။အဲဒါတွေကို တွေးပြီး ကျမလည်း ကြောက်မိပါတယ်။
” ပုဏ္ဏားကျွန်းမြို့နယ်၊ တောင်မင်းကလာ စစ်ဘေးရှောင်စခန်းက ကိုယ်ဝန် ၈ လ ရှိနေပြီဖြစ်တဲ့ ဒေါ်မတင်လှ ၃၅နှစ်က ပြောပါတယ်။ တချို့ကိုယ်ဝန်ဆောင် အမျိုးသမီးတွေဆိုရင် ကိုယ်ဝန်ဆောင်ချိန်အတွင်း ကာကွယ် ဆေးမထိုးရတာတွေ ကျန်းမာရေးစောင့်ရှောက်မှု ကောင်းကောင်း မရတာတွေနဲ့ စားဝတ်နေရေး ပြသနာဖြေရှင်းဖို့ ကိုယ်ဝန်အရင့်အမာတွေနဲ့အလုပ်လုပ်နေရတာတွေကြောင့် ကလေးအသေမွေးတဲ့အထိ ရှိလာတယ်လို့ စစ်ဘေးရှောင်ကျန်းမာရေး အသိုင်းအဝန်းက ပြောကြပါတယ်။
မြို့နယ် ၁၇ ခုနဲ့ ဖွဲ့စည်းထားတဲ့ ရခိုင်ပြည်နယ်မှာ အာရက္ခတပ်တော် အေအေက ၁၄ မြို့နယ်ကို သိမ်းပိုက်ထိန်းချုပ်ထားနိုင်ပြီးဖြစ်ပါတယ်။ ဒါပေမဲ့ ဆေးရုံဆေးခန်းတွေ လူနေထူထပ်တဲ့ နေရာတွေကို စစ်ကောင်စီကလေကြောင်းနဲ့ ဗုံးကြဲတိုက်ခိုက်မှုတွေကြောင့် အေအေ ထိန်ချုပ်ထားတဲ့ မြို့နယ်တွေမှာလည်းဆေးရုံဆေးခန်းတွေ ပုံမှန် မလည်ပတ်နိုင်ဘူးလို့သိရပါတယ်။စစ်ကောင်စီရဲ့ ပိတ်ဆို့ဖြတ်တောက်မှုတွေကြောင့် ကာကွယ်ဆေးအပါအဝင် ဆေးဝါးစျေးနှုန်းတွေလည်း အရင်အတိုင်းပဲ မြင့်တက်နေဆဲ ဖြစ်တယ်လို့ ဆိုကြပါတယ်။
