စစ်တွေမြို့နယ်က စစ်ဘေးရှောင် အမျိုးသမီး လေးယောက်ရေနစ်သေဆုံး

ညီထွေး

ရခိုင်ပြည်မြောက်ပိုင်း၊ ရသေ့တောင်မြို့နယ်မှာ စစ်ဘေးရှောင်နေတဲ့ စစ်တွေမြို့နယ်က  စစ်ဘေးရှောင် အမျိုးသမီး ၄ ယောက် ရေနစ်ပြီး သေဆုံးသွားခဲ့တယ်လို့ သိရပါတယ်။

သူတို့တွေဟာ ရသေ့တောင်မြို့နယ်၊ ချိန်ခါလီကျေးရွာမှာ စစ်ဘေးရှောင်နေကြတာဖြစ်ပြီး မေလ ၂၁ ရက် ညနေ ၄ နာရီကျော်အချိန် ကျေးရွာအနီး၊ ရေမြောင်းတစ်ခုမှာ ရေချိုးနေချိန် ရေနစ်မြုပ်သေဆုံး သွားတာဖြစ်တယ်လို့ ဒေသခံတွေက ပြောပါတယ်။

” အဲဒီမြောင်းထဲ ညီအစ်မလေးယောက် ရေချိုးနေရင်းနဲ့ အခုလိုရေနစ်မြုပ်ပြီး သေဆုံးခဲ့ကြတာပါ” လို့ ရသေ့တောင်မြို့နယ်က အမျိုးသမီးတစ်ယောက်က ပြောပါတယ်။

သေဆုံးသွားသူတွေကတော့ အသက် ၁၅ နှစ်အရွယ် မဌေးဌေးဝင်း၊ အသက် ၁၆ နှစ်အရွယ် မငြိမ်းငြိမ်း လှိုင်၊ အသက် ၂၀ ကျော်အရွယ် မဇိမချေ​(ခ)လှလှဝင်း နဲ့  အသက် ၂၃ နှစ်အရွယ် မဌေးဝင်းဦးတို့ ဖြစ်ကြ ပါတယ်။

သေဆုံးသွားသူတွေကို မေလ ၂၂ ရက် ညနေပိုင်းမှာ သင်္ဂြိုလ်သွားမယ်လို့ သိရပါတယ်။

တိုက်ပွဲပြင်းထန်လာတဲ့အချိန်ကစပြီး စစ်တွေမြို့နယ်အတွင်းက ဒေသခံတွေမှာ ပြည်မဖြစ်တဲ့ ရန်ကုန်မြို့ နဲ့ အာရက္ခတပ်တော် AA ထိန်းချုပ်ထားတဲ့ နယ်မြေ​တွေကို ထွက်ပြေးတိမ်းရှောင်နေကြပါတယ်။

ပြီးခဲ့တဲ့ ၂၀၂၄ ခုနှစ်၊ ဇွန်လကလည်း ပုဏ္ဏားကျွန်းမြို့နယ်အတွင်းက စစ်ဘေးရှောင်အမျိုးသမီး  ၂ ယောက် ရေနစ်သေဆုံးသွားခဲ့ကြပါသေးတယ်။

တိုက်ပွဲတွေဖြစ်ပွားနေတဲ့ ရခိုင်ဒေသမှာရှိတဲ့ စစ်ဘေးရှောင်အမျိုးသမီးတွေဟာ ကဏ္ဍအသီးအသီးမှာ ထိခိုက်နစ်နာမှုနဲ့ မလုံခြုံမှုတွေရှိနေပါတယ်။

ဓာတ်ပုံ – ABN 

ပုံစာ – ရေနစ်မြုပ်သေဆုံးသွားတဲ့ အမျိုးသမီးတွေ။