လှောင်ပြောင်ခွဲခြားမှုပုံစံခွက်ထဲက LGBT ဇာတ်ရုပ်နဲ့ရုပ်သံတွေ

ထနောင်းမေ

ပုံမကျပန်းမကျတဲ့ မိန်းမအဝတ်အစားတွေ ဝတ်ဆင်ထားပြီး၊ မိတ်ကပ်ထူထူ၊ နှုတ်ခမ်းနီရဲရဲနဲ့ စကားကို မပီမသ ပြောဆိုတဲ့ Gay လို့ခေါ်တဲ့ မြန်မာအခေါ် မိန်းမလျာဇာတ်ကောင်တွေဟာ မြန်မာရုပ်ရှင်ဇာတ်လမ်းတွေထဲမှာ   တွေ့ ရလေ့ရှိတဲ့ LGBT ဇာတ်ရုပ်တွေဖြစ်ပါတယ်။

ဒီဇာတ်ကောင်တွေဟာ ပွင့်လင်းလွန်းတဲ့ လိင်ပိုင်းဆိုင်ရာ အသုံးအနှုန်းတွေ တွင်တွင်ပြောတတ်ကြပြီး ယောက်ျားတွေကို အမြဲတစေ အငန်းမရဆွဲဆောင်တတ်ကြသူတွေလည်း ဖြစ်ပါတယ်။

ဒီဇာတ်လမ်းတွေထဲမှာ အခြားယောက်ျားတွေက သူတို့ကိုကြောက်ရွံ့တာ၊ မိန်းမတွေကလည်း သူတို့ကိုခွဲခြားတာ၊ မိသားစုနဲ့ပတ်ဝန်းကျင်အသိုင်းအဝိုင်းက သူတို့ကို ချိုးနှိမ်ဆက်ဆံကြတာတွေလည်း မပါလို့မဖြစ်ပြန်ပါဘူး။

တချို့ Gay ဇာတ်ရုပ်/မိန်းမလျာ(အရပ်အခေါ်)တွေအနေနဲ့ကတော့ နောက်ဆုံးမှာ ယောကျာ်းစစ်စစ်အဖြစ် လိင် စိတ်ခံယူမှု ပြန်ပြောင်းသွားပြီး မိန်းမတစ်ယောက်နဲ့ ပျော်ရွှင်စွာပေါင်းဖက်ကြလေသတည်းဆိုတာမျိုးလည်း မရိုးနိုင် အောင် တွေ့ရတတ်သလို Tomboy ဇာတ်ရုပ်/ယောက်ျားလျာ (အရပ်အခေါ်)တွေမှာတော့ မင်းသမီးဖြစ်သူကို မင်း သားနဲ့အပြိုင်ပိုးပန်းတာ၊ နောက်ဆုံးမှာ အချစ်စစ်နဲ့တွေ့တဲ့အခါ လိင်စိတ်ခံယူမှုတွေ ပြန်ပြောင်းသွားပြီး ဇနီး ကောင်း၊ မိခင်ကောင်းဖြစ်ဖို့ ကြိုးစားကြတာမျိုးတွေလည်း ရိုက်ကူးတတ်ကြပါတယ်။

အများအားဖြင့် LGBT ဇာတ်ကောင်တွေကို လူရယ်စရာ၊ လှောင်ပြောင်စရာ၊ တဆင့်နိမ့်ခွဲခြားဆက်ဆံစရာ၊ လူ့ပါတ် ဝန်းကျင်မှာ မရှိသင့်သူတွေအဖြစ်  ဦးတည်ရိုက်ကူးလေ့ရှိကြပါတယ်။

LGBT တွေရဲ့အလုပ်အကိုင်တွေကိုလည်း အမြင့်ဆုံးမိတ်ကပ်ပညာရှင်၊ နတ်ကတော်၊ အိမ်ဖော်၊ ရှောက်သီးဆေးပြား သည် စတဲ့အလုပ်အကိုင်တွေကို ထည့်သွင်းရိုက်ကူးကြတယ်။   အဆိုးဆုံးကတော့ LGBT လို့ခံယူထားသူတွေ ကိုယ်တိုင်က LGBT ဇာတ်ရုပ်တွေကို လှောင်ပြောင်စရာအဖြစ် သရုပ်ဆောင်မှုတွေပဲဖြစ်ပါတယ်။

၂၀၁၆ ခုနှစ်နဲ့ ၂၀၁၇ ခုနှစ်အတွင်း ထုတ်လုပ်ခဲ့တဲ့ မြန်မာရုပ်ရှင်ဇာတ်ကား ၈၃ ကားအနက် ၃၆ ကားမှာ အမျိုးသမီး တွေနဲ့ LGBT ဇာတ်ကောင်တွေရဲ့ စွမ်းဆောင်ရည်ကို တန်ဖိုးလျှော့ချခြင်း၊ လိင်ကွဲပြားမှုအခြေခံ ခွဲခြားဆက်ဆံမှု တွေပါဝင်ခဲ့တယ်လို့ ၂၀၁၈ ခုနှစ်က ပညာအလင်းပွင့် မြန်မာသုတေသနဖောင်ဒေးရှင်းက ထုတ်ဝေခဲ့တဲ့ မြန်မာ့ ရုပ်ရှင်‌လောက၏ ကျား-မဆိုင်ရာ အသိအမြင်နိုးကြားမှုစာတမ်းမှာဖော်ပြထားပါတယ်။

ခေတ်အဆက်ဆက်က အသားကျခဲ့တဲ့   ဒီလိုရိုက်ကူးပုံဖော်မှုတွေကို လက်ရှိအတွေးအခေါ်တော်လှန်ရေးကာလမှာ လက်သင့်ခံသင့်မခံသင့် မေးခွန်းထုတ်စရာဖြစ်ပါတယ်။

မြန်မာရုပ်ရှင်နဲ့ ဖျော်ဖြေရေးအစီအစဉ်တွေမှာ LGBT တွေကိုလွှဲမှားစွာ ပုံဖော်မှု

မြန်မာရုပ်ရှင်နဲ့ ဟာသဖျော်ဖြေရေးအစီအစဉ်အများစုက LGBT ဇာတ်ကောင်တွေကို လှောင်ပြောင်တာ၊ အောင်မြင် မှုမဲ့တဲ့ ဇာတ်ဆောင်ဇာတ်ရုပ်၊ သဘာဝမဟုတ်တဲ့ စကားအပြောအဆို၊ အပြုအမူတွေနဲ့ တင်ဆက်တတ်ပြီး ဒီလို သရုပ်ဖော်မှုတွေဟာ လက်တွေ့ဘဝအထဲက LGBT လူတွေကို မေးမြန်းခြင်းမရှိပဲ၊ သဘောထားအမှားတွေကိုသာ ထပ်ခါထပ်ခါ ဖော်ပြသလိုဖြစ်နေပါတယ်လို့ အတာက မှတ်ချက်ပြုပါတယ်။

အတာဟာTrans Women တစ်ဦးဖြစ်ပြီး သတင်းတင်ဆက်သူတစ်ဦးလည်းဖြစ်ပါတယ်။ လက်ရှိမှာတော့ မီဒီယာနဲ့ လူ့အခွင့်အရေး ပညာပေးလှုပ်ရှားမှုတွေအပြင်၊ Documentary ရိုက်ကူးရေးနဲ့ သတင်းထုတ်လုပ်ရေးတွေ ဆောင် ရွက်နေသူဖြစ်တယ်။ သူဟာ ၂၀၂၃ ခုနှစ်မှာ Southeast Asia Women of the Future Awards – Media and Communication ဆုချီးမြှင့်ခံထားရသူလည်းဖြစ်ပါတယ်။

“ကျမတစ်ယောက်အနေနဲ့ LGBT ဇာတ်ကောင်တွေကို ဟာသအဖြစ် သဘောထားပြီး ထင်ရှားတဲ့ရှက်ဖွယ်အခန်း တွေအနေနဲ့ တင်ဆက်ကြတာကို မြင်ရတာ ကြည်နူးမှုမရှိဘဲ စိတ်နာလှပါတယ်။ ကိုယ့်လူအုပ်စုကို လူထုရဲ့ အတွေးထဲမှာ  ဆိုးယုတ်တဲ့ပုံစံနဲ့ သိမြင်စေတာဖြစ်တယ်”လို့ အတာက ပြောပါတယ်။

‌မြန်မာဇာတ်လမ်းတွေမှာ LGBT တွေကို အခြောက်လို့  label(တံဆိပ်)တပ်ပြီး၊ မိန်းကလေးအဝတ်အစားတွေ ဝတ် ခိုင်းပြီး တိုက်ရိုက်ဖြစ်စေ၊ သွယ်ဝိုက်ဖြစ်စေ သားမယားပြောပြောပြီး စော်ကားတာတွေ၊ ရုံတင်ကားကအစ ဗွီဒီယို ကားအဆုံး LGBT တွေက အမြဲတမ်းမိတ်ကပ်ဆရာတွေ၊ အိမ်အကူတွေ၊ အနှိမ်ခံတွေအနေနဲ့ ရိုက်ကူးနေကြရတာကို မြင်ရတာ စိတ်မသက်မသာဖြစ်ရတယ်” လို့ အသက် (၁၈)နှစ်အရွယ် GED ကျောင်းသားတစ်ဦးဖြစ်ပြီး Gay အဖြစ် ခံယူထားတဲ့ Chris Grey ကပြောပါတယ်။

မြန်မာရုပ်ရှင်ဇာတ်လမ်းတွေမှာ LGBT ဇာတ်ကောင်တွေတော်တော်များများကို ဟားတိုက်စရာ၊ အမြဲလွဲမှားနေသူ တွေ၊ အပြင်လက်တွေ့ဘဝမှာ ရှိတာနည်းတဲ့ အဖြစ်အပျက်တွေကို အလွန်အကျူးပုံဖော်ပြီး ရိုက်ကူးတာတွေ မြင်ရတဲ့အခါ   စိတ်မကောင်းဘူးလို့ အသက် (၃၀)အရွယ် August Mon က မှတ်ချက်ပြုပါတယ်။ သူဟာ LGBT အခွင့်အရေးတွေနဲ့ပတ်သက်ပြီး အသိပညာပေးဆောင်ရွက်နေသူတစ်ဦးဖြစ်ပါတယ်။

ဟာသဆိုတာ အများကြီးရှိပါတယ်။ LGBT တွေကို အမြဲတမ်းဟာသအဖြစ် ရိုက်ကူးမှ ဟာသရုပ်ရှင်ဖြစ်မှာလားလို့ လည်း သူက မေးခွန်းထုတ်ပါတယ်။

တခြားနိုင်ငံတွေမှာလည်း  LGBT ဇာတ်ကောင်တွေကို ထည့်သွင်းရိုက်ကူးပေမယ့် ဟာသကို ဟာသပုံစံအတိုင်း ရိုက် ကူးတာမျိုး၊ လူထုအမြင်လွဲမှားစေတဲ့ ဇာတ်ရုပ်တွေ မထည့်သွင်းတာ၊ ဇာတ်လမ်းမစခင်မှာလည်း စိတ်ကူးယဉ် ဇာတ်ကောင်တွေသာဖြစ်တယ်လို့ ကြိုတင်အသိပေးတာမျိုးတွေရှိပြီး လူ့အခွင့်အရေးကို မလေးစားတာမျိုး မဖြစ် အောင် ကြိုတင်ကာကွယ်တာတွေ ပြုလုပ်လေ့ရှိတာကိုတွေ့ရတယ်လို့ August Mon ကထောက်ပြပါတယ်။

ရုပ်ရှင်တွေဟာ ရုပ်ရှင်ပြင်ပဘဝက LGBT တွေအပေါ်သက်ရောက်မှုတွေရှိခဲ့

ဒီလိုဇာတ်ရုပ်တွေ ပုံဖော်ရိုက်ကူးမှုကြောင့် ပြင်ပလောကက LGBT တွေအပေါ်မှာ သက်ရောက်မှုတွေရှိပါတယ်။

တီဗီဖန်သားပြင်ပေါ်မှာ ညံ့ဖျင်းတဲ့ LGBT ဇာတ်ကောင်တွေကိုသာ အမြဲမြင်တွေ့နေတဲ့အခါ လူထုအတွေးအမြင်မှာ “LGBT ဆိုတာ ထူးဆန်းတယ်၊ ဟာသဖြစ်တယ်၊ ရယ်စရာတစ်ခုပဲ” ဆိုတဲ့အမြင်မျိုးရအောင် ဖန်တီးခံထားရတဲ့ အတွက် LGBT လူငယ်တွေဟာ မိသားစုနဲ့ လုပ်ငန်းခွင်တွေမှာ ခွဲခြားခံနေရတဲ့အခြေအနေတွေကို မပြောင်းလဲနိုင်ပဲ ပိုမိုဆိုးကျိုးသက်ရောက်စေတယ်လို့ အတာက မှတ်ချက်ပြုပါတယ်။

“ဖျော်ဖြေရေးတွေအနေနဲ့ တစ်စုံတစ်ယောက်ကို ပုံမှန်မဟုတ်တဲ့ပုံစံနဲ့ မြင်သွားတဲ့အခါ တကယ်ဘဝထဲမှာလည်း အဲဒီ stereotype (ပုံစံခွက်) နဲ့ပဲ ကြုံတွေ့ရတတ်ပါတယ်။ ကျမကိုယ်တိုင်လည်း LGBT ဖြစ်တဲ့အနေနဲ့ တခါတလေ “မင်းကလည်း အဲဒီလိုလား” ဆိုပြီး နှိုက်နှိုက်ချွတ်ချွတ် မေးမြန်းပြောဆိုခြင်းတွေ ကြုံဖူးပါတယ်။ ဒီဟာတွေက ရုပ် ရှင်နဲ့ ဟာသဖျော်ဖြေရေးထဲက သက်ရောက်မှုတွေပါ” လို့ အတာက သူ့အတွေ့အကြုံကိုပြောပါတယ်။

ဒီလိုပုံဖော်ရိုက်ကူးမှုတွေက  LGBT တွေအတွက် မလုံခြုံစိတ်တွေ၊ ကိုယ့်ကိုကိုယ်အားမလိုအားမရစိတ်တွေ ဖြစ်စေ ပြီး လူတောမတိုးတာမျိုး၊ ကိုယ့်ကိုယ်ကို သတ်သေကြတာမျိုးတွေအထိ ဖြစ်နိုင်တယ်လို့ အသက်(၁၈)နှစ်အရွယ် Chris Grey ကပြောပါတယ်။

“ အဲဒီလို ၁ မိနစ် ၂ မိနစ် ရုပ်သံအပိုင်းလေးတွေတောင် အခုလိုသက်ရောက်မှုတွေရှိနေတာကို ကျွန်တော်တို့အပေါ် တွေ့နေကျမြင်နေကျပုံစံလိုလို ထုတ်ဖော်နေကြတာ၊ normalize (ပုံမှန်ဖြစ်သလို) လုပ်နေတာဟာ အင်မတန်ကို ကြောက်စရာ ကောင်းပါတယ်”လို့ Chris Grey က ဆက်ပြောပါတယ်။

လက်ရှိပြင်ပက LGBT တွေဟာ ရုပ်ရှင်ထဲကလို လှောင်ပြောင်စရာ၊ ခွဲခြားနှိမ့်ချစရာတွေမဟုတ်တဲ့အတွက် ဒီလို ရိုက်ကူးထုတ်လုပ်မှုတွေကို ရှုတ်ချတယ်လို့ Trans Women တစ်ဦးဖြစ်တဲ့ ဆူနာမီက ဝေဖန်ပါတယ်။  ဆူနာမီဟာ နွေဦးတော်လှန်ရေးမှာ မြေပြင်သပိတ်တွေကို ဦးဆောင်နေသူတစ်ဦးဖြစ်သလို LGBT အရေးမှာလည်း တက်ကြွ လှုပ်ရှားသူတစ်ဦးဖြစ်ပါတယ်။

“အဲဒီလိုပုံစံမျိုးတွေ ရုပ်ရှင်ဇာတ်ကားတွေ ရိုက်တာများလာရင် လူတွေရဲ့စိတ်မှာ  ရုပ်ရှင်ထဲကဆိုတဲ့အတွေးတွေက  ပြင်ပလောကကို ထိထိရောက်ရောက် ခွဲခြားဆက်ဆံတာမျိုးတွေ နိုင်ထက်စီးနင်းပြုချင်လာတဲ့ ပုံစံမျိုးတွေလည်း ကြုံနေရတယ်” လို့ ဆူနာမီက ဆိုပါတယ်။

ဒါအပြင် LGBT တွေကိုယ်တိုင်က ဒီလိုလှောင်ပြောင်စရာဇာတ်ရုပ်တွေအဖြစ် သရုပ်ဆောင်မှုတွေလည်း ရှိပါတယ်။ ဒီအပေါ်မှာလည်း LGBT တချို့နဲ့ LGBT အရေးလှုပ်ရှားသူတွေက ထောက်ပြကြပါတယ်။ ဒီလိုမျိုးဇာတ်ကားထဲမှာ ခွဲခြားဆက်ဆံတာတွေကို ပုံဖော်ရိုက်ကူးခြင်းအားဖြင့် အပြင်မှာ ဒီထက်ပိုဆိုးတဲ့အနိုင်ကျင့်မှုတွေ၊ ခြိမ်းခြောက်တာ တွေ၊ အကြပ်ကိုင်တာတွေ အများကြီးဖြစ်နိုင်တယ်လို့ August Mon ကဆိုပါတယ်။

“LGBT တွေကိုယ်တိုင်ကိုက တလွဲဇာတ်ရုပ်တွေ ရိုက်တာမျိုးရှိတယ်။ သူတို့ကိုယ်တိုင် ဒီလိုဇာတ်ရုပ်တွေ ရိုက်နေ သေးတာပဲ၊ ဘာထူးဆန်းလို့လဲဆိုပြီး normalize ဖြစ်သွားတယ်။ ဇာတ်လမ်းအပြင်က LGBT တွေကလည်း အဲဒီလို ပုံစံပဲဖြစ်မယ်လို့ ထင်ပြီးတော့ ဆိုးကျိုးတွေ ပိုဖြစ်စေနိုင်တယ်”လို့ August Mon ဆိုပါတယ်။

LGBT တွေအပေါ်လူမှုအသိုင်းအဝိုင်းက လက်ခံမှုဘယ်လောက်ရှိပြီလဲ

လက်ရှိနွေဦးတော်လှန်ရေးကာလမှာ စစ်အာဏာရှင်စနစ်နဲ့အတူ အတွေးအခေါ်တော်လှန်ရေးကိုပါ တပါတည်းဆင် နွှဲနေရတာဖြစ်တဲ့အတွက် LGBT တွေအပေါ် ခွဲခြားဆက်ဆံမှုတွေနဲ့ပတ်သက်ပြီး လူမှုအသိုင်းအဝိုင်းရဲ့အမြင် သဘောထားက အရမ်းကြီးတော့ တိုးတက်မလာသေးဘူးလို့ ဆူနာမီကဆိုပါတယ်။

တော်လှန်ရေးထဲမှာတောင်မှ LGBT တွေကို နှိပ်ကွပ်ပြီးတော့ ခွဲခြားဆက်ဆံတာတွေက ကြုံနေရကြားနေရပြီး အဲဒီ လိုပုံစံမျိုးတွေကို ဆူနာမီကိုယ်တိုင်လည်း ကြုံရလေ့ရှိပါတယ်။

“ကျမတို့ LGBT ပြောလိုက်တဲ့စကားက အရာမရောက်သလို ပုံစံမျိုး၊ LGBT တစ်ယောက်ဖြစ်နေလို့ အမြင်တွေ စောင်းပြီးတော့ ကြည့်တာမျိုးတွေ ခံရတယ်။ ပြင်ပက လူတွေမဟုတ်ဘူး။ တော်လှန်ရေးရဲ‌ဘော်အချင်းချင်းကြားမှာ     အခုလိုမျိုးကြည့်ကြတယ်”လို့ ဆူနာမီက သူ့အတွေ့အကြုံကိုပြောပါတယ်။

နွေဦးတော်လှန်ရေးကာလမှာ လူငယ်တွေ၊ လှုပ်ရှားသူတွေကတဆင့် “တန်းတူညီမျှမှု” ဆိုတာကို ပိုနားလည်လာ ကြပြီး များသောအားဖြင့် အရင်ကလူ့အဖွဲ့အစည်းထဲမှာ မမြင်ရခဲ့တဲ့အာရုံစိုက်မှုတွေ၊ မျှတမှုတွေကို လေ့လာကြ တာ၊ ပြန်လည်သုံးသပ်မှုတွေရှိလာတာတွေ့ရပေမယ့် အများပြည်သူအဆင့်အထိ ပြောင်းလဲမှုကတော့  မဖြစ်သေးပါ ဘူးလို့ အတာက ကောက်ချက်ချပါတယ်။

နွေဦးတော်လှန်ရေးမှာ အမျိုးသမီးနဲ့ LGBT တွေဟာ တော်လှန်ရေးရဲ့ အခန်းကဏ္ဍတွေမှာ အများအပြားပါဝင်လာ ကြပြီး ဒီလိုပါဝင်လာခြင်းက လူတွေရဲ့ အမြင်တွေ၊ အယူအဆတွေကို အတော်လေးပြောင်းလဲနိုင်တယ်လို့ August Mon က သုံးသပ်ပါတယ်။

ပြောင်းလဲမှုများဆီသို့

နဂိုကတည်းက လူမှုအသိုင်းအဝိုင်းမှာ အ‌ရိုးစွဲနေတဲ့ အယူအဆတွေကို ပြောင်းလဲဖို့ကြိုးစားရာမှာ လူ့အဖွဲ့အစည်းကို လွှမ်းမိုးမှုရှိတဲ့ ဖျော်ဖြေရေးနဲ့ ရုပ်ရှင်ထုတ်လုပ်သူတွေကို ပညာပေးမှုတွေနဲ့ စည်းရုံးလှုံ့ဆော်မှုတွေ အစီအစဉ်တကျ လုပ်ဆောင်သင့်နေပါပြီ။

ဇာတ်ညွှန်းရေးသူတွေ၊ သရုပ်ဆောင်တွေကို sensitization training (အကဲဆတ်မှုကို ခံစားနားလည်နိုင်တဲ့ လေ့ကျင့်မှု) ပေးတာ၊ LGBT တွေကို လူ့သဘာဝအတိုင်း၊ မျှတတဲ့ဇာတ်ကောင်အဖြစ် ထည့်သွင်းဖော်ပြတာ၊ Audience (ပရိတ်သတ်)တွေကို media literacy (မီဒီယာအတတ်) ပညာပေးတာ၊ stereotype (သမရိုးကျပုံစံခွက်) တွေကို ပယ်ဖျက်ဖို့ စာပေ၊ သတင်းမီဒီယာတွေက ပါဝင်ဖော်ပြဖို့ လိုအပ်တယ်လို့ အတာက အကြံပြုပါတယ်။

“ကျမအနေနဲ့ LGBT တွေအတွက် တန်းတူညီမျှတဲ့အသံထွက်ခွင့်၊ ဘဝရွေးချယ်ခွင့်နဲ့ ဘေးကင်းလုံခြုံစွာ အသက် ရှင်ခွင့်ရှိဖို့ ကြိုးပမ်းတောင်းဆိုချင်ပါတယ်။ ဖျော်ဖြေရေးနဲ့ မီဒီယာမှာပါ LGBT လူတွေကို ဂုဏ်ယူစရာ ဇာတ်ကောင် တွေအနေနဲ့ ဖော်ပြပေးနိုင်ဖို့ ဆန္ဒရှိပါတယ်”လို့ အတာက ဆန္ဒပြုပါတယ်။

LGBT တွေအနေနဲ့ ကိုယ်ကိုကိုယ်တန်ဖိုးထားကာ လှလှပပဂုဏ်သိက္ခာရှိရှိနေထိုင်သွားဖို့၊ လိုတာထက်ပိုပြီး သရုပ် ပျက်တာမျိုးတွေ တတ်နိုင်သလောက်ရှောင်ကျဉ်ကြဖို့ ဆူနာမီကလည်း တိုက်တွန်းလိုက်ပါတယ်။

“LGBT တွေကိုယ်တိုင်ကလည်း ရုပ်ရှင်ဇာတ်ကားတွေထဲက မကောင်းတဲ့အမူအကျင့်တွေကို မယူမိဖို့လိုတယ်။ ဥပမာအားဖြင့် မိန်းမလျာတွေဆို ယောကျာ်းလေးတွေကို လိုက်စတာမျိုးတွေ၊ ကိုယ့်အုပ်စုတောင့်တိုင်း တခြားသူ တွေကို အတင်းကာရော လိုက်ပြီးဖွန်ကြောင်တာ၊ အနှောက်အယှက်ပေးတာမျိုး၊ အဲဒီလိုမျိုးမလုပ်သင့်ဘူး။ ကျမတို့ က LGBT ဆိုတာကို ကောင်းတဲ့အပြောင်းအလဲလေးနဲ့ တွဲမြင်စေချင်တယ်ဆိုရင် ကိုယ်ကိုယ်တိုင်ရဲ့အမူအကျင့်တွေ ကိုလည်း ထိန်းသိမ်းရမယ်” လို့ August Mon ကဆိုပါတယ်။

LGBT အုပ်စုထဲမှာ ကိုယ်ကရှိနေတယ်ဆိုရင် ကိုယ့်ရဲ့ဖြစ်တည်မှုကို တန်ဖိုးထားပြီးတော့မှ တခြားသူကို မထိခိုက်စေ တဲ့အပြုအမူလေးတွေနဲ့ ရှင်သန်ကြဖို့၊ တခြားသူတွေကို စိတ်အနှောက်အယှက်ဖြစ်စေမယ့်အပြုအမူမျိုးတွေ အမူအကျင့်မျိုးတွေကို မလုပ်မိဖို့လိုတယ်လို့ သူကဆိုပါတယ်။

“အဲဒီလိုလုပ်မိလိုက်တယ်ဆိုရင် ရုပ်ရှင်ထဲမှာ ပြနေတာတွေက တကယ်ဖြစ်နေတယ်ဆိုပြီး လူတွေကပိုပြီး ခွဲခြား နိမ့်ချကြဦးမှာပါ။ အပြင်လောကမှာရှိနေတဲ့ LGBT တွေဟာ ရုပ်ရှင်ထဲကလို မဟုတ်ဘူး။ ဘာမှမဆိုင်ဘူး။ ငါတို့က ဘယ်လိုဂုဏ်သရေရှိရှိနေထိုင်တယ်ဆိုတာ  သက်သေပြဖို့ အရေးကြီးတယ်”လို့ August Mon ကဆိုပါတယ်။

ဒီမိုကရေစီအစိုးရလက်ထက်မှာတုန်းကတော့ လှောင်ပြောင်စရာ၊ ဟာသလုပ်စရာ အသုံးအနှုန်းတွေနဲ့ပတ်သက်ပြီး ရုပ်ရှင်မီဒီယာလောကကို အသိပညာပေးတာတွေ၊ ဆွေးနွေးပွဲတွေ ပြုလုပ်တာ လူ့အခွင့်အရေးနဲ့ လူ့ဂုဏ်သိက္ခာ တွေကို လေးစားလိုက်နာသင့်ကြောင်း ဟောပြောတာတွေပြုလုပ်ခဲ့ကြတယ်လို့လည်း August Mon ကဆိုပါတယ်။

“အားလုံးသိကြတဲ့အတိုင်းပဲ၊ အခုချိန်မှာတော့အလှမ်းဝေးသွားပြီ၊ လက်ရှိမြန်မာနိုင်ငံရဲ့ရုပ်ရှင်လောကထဲမှာ ကျန် နေခဲ့တဲ့သူအများစုကလည်း စစ်တပ်နဲ့ဆက်နွယ်နေတဲ့လူတွေဖြစ်တယ်။ brainwash (ဦးနှောက်ဆေးတာ) ခံထား ရတဲ့လူတွေလည်းဖြစ်တယ်။ တော်လှန်ရေးဘက်ကိုမပါပဲနဲ့ စီးပွားရေးဘက်ကိုပဲ သွားတဲ့လူတွေဖြစ်တဲ့အခါ ကျတော့ အခုအခြေအနေမှာ လုပ်ဖို့ ခက်ခဲသွားတယ်” လို့ August Mon က ပြောပါတယ်။

စစ်တပ်အုပ်ချုပ်တဲ့ နိုင်ငံတနိုင်ငံဖြစ်သွားတဲ့အခါမှာ ဒီမိုကရေစီစနစ်မဟုတ်တော့ဘဲ လူလူချင်းတန်ဖိုးထားမှု စံနှုန်း တွေပြန်လျော့ကျသွားကာ အရင်က တိုးတက်စပြုနေတဲ့အရာတွေက အခုအခြေအနေမှာ ပြန်နောက်ဆုတ်သွားတာ ကို ရုပ်ရှင်အသိုင်းအဝိုင်းတင်မက တခြားနေရာတွေမှာလည်း ကြုံတွေ့နေရတယ်လို့ သူကဆက် ပြောပါတယ်။

“ဒါကြောင့်  လူ့အဖွဲ့အစည်းကတော့ အာဏာရှင်ကို ဆက်ပြီးတွန်းလှန်ဖို့ အရေးကြီးပါတယ်။ အာဏာရှင်ပြုတ်ကျ သွားမှ ကျွန်မတို့လိုချင်တဲ့ဖန်တီးမှုတွေ၊ ခံစားသက်ဝင်မှုတွေ၊ လွတ်လပ်မှုတွေပြန်ရပြီးတော့ တကယ့်ကောင်းတဲ့            နိုင်ငံပြန်ဖြစ်လာမယ်လို့ ကျမက အကြံပြုချင်ပါတယ်”လို့ August Mon က ပြောပါတယ်။